सापकोटाको रिट न्यायाधीश ढुंगानाको इजलासको तेस्रो नम्बरमा

काठमाडौं : संवैधानिक आयोग भएका नियुक्ति बदर गर्न माग गर्दै सभामुख अग्‍निप्रसाद सापकोटाले सर्वोच्च अदालतमा दायर गरेको रिट न्यायाधीश प्रकाशकुमार ढुंगानाको इजलासमा परेको छ । सापकोटाले उत्प्रेषणको आदेश माग्दै दायर गरेको रिट ढुंगानाको इजलासमा तेस्रो नम्बरमा परेको सर्वोच्चको वेबसाइटमा उल्लेख छ । 

वेबसाइटमा ढुंगानाको इजलासमा पहिलो नम्बरमा परेको रिटको सुनुवाइ सकिएको र दोस्रो रिटको सुनुवाइ भइरहेको उल्लेख छ । जारी सुनुवाइ सकिएपछि मात्रै सापकोटाको रिटको सुनुवाइ सुरु हुनेछ । 

---

सापकोटाले संवैधानिक आयोगहरूमा पाँच जना प्रमुखसहित ३२ जनालाई संसदीय सुनुवाइको प्रक्रिया पूरा नगरी गरिएको नियुक्ति बदर गर्न माग गर्दै शुक्रबार रिट दायर गरेका थिए । 

त्यसअघि सभामुख सापकोटाले नियुक्ति सिफारिस प्रक्रिया नमिलेको र प्रतिनिधि सभा विघटन भएकाले सुनुवाइ हुन नसक्ने भन्दै सिफारिस संवैधानिक परिषद्‍‍मा फिर्ता पठाएका थिए । त्यसको दुई दिनपछि राष्ट्रपति भण्डारीले संवैधानिक अंगहरूमा नियुक्त गरेपछि सभामुख सापकोटाले सर्वोच्चमा रिट दायर गरेका थिए ।