प्रदेश-२ प्रमुख पदमुक्त प्रकरण : 'न्यायका लागि अदालत जान्‍छु'

जनकपुरधाम : प्रदेश २ को प्रमुखबाट बर्खास्त भएका निवर्तमान प्रदेश प्रमुख तिलक परियारले न्यायका लागि अदालत जाने बताएका छन् । शुक्रबार सञ्चारकर्मीसँग कुराकानी गर्दै उनले भने, 'सरकारको यस निर्णयबाट म आफैँ दङ्ग परेको छु, न कुनै जानकारी, न कुनै स्पष्टीकरण । संवैधानिक पदमा बसेका व्यक्तिलाई एक्कासी बर्खास्त यो गलत नजिरको सुरुवात हो ।'

उनले आफ्नो कार्यसम्पादन निर्विवाद रहेको दाबी गर्दै आफ्नो बर्खास्तीलाई दलित समूदायमाथिको आक्रमण पनि भनेका छन् ।  'यो मेरो व्यक्तिगत मात्र नभई सिङ्गो दलित समूदाय माथिको आक्रमण हो । काठमाडौँ फर्केपछि न्यायका लागि अब अदालत जानेछु' उनले भने ।

---

उनले आफूलाई शंका र उपशंकाको भरमा पदमुक्त गरेको पनि बताए । 'म निष्पक्ष र इमान्दारीका साथ आफ्नो काम गर्दै आइरहेको थिए न कुनै गुट उपगुटमा लागेको थिए, तर शंका उपशंकाको भरमा मलाई पदमुक्त गर्नु गलत हो' उनले भने ।  परियारले आफूले गलत काम गरेको भए राष्ट्रपतिले स्पष्टीकरण सोध्‍ने व्यवस्था रहेको भन्दै त्यसाे नगरिएको प्रति आपत्ति जनाए ।

'म बाट कुनै गलत वा विवादित काम भएको छ भने राष्ट्रपतिले स्पष्टीकरण लिन सक्थ्यो,' उनले भने, 'तर, त्यस्तो नगरेर दलित भएको वा कर्मचारीबीचको अडियो प्रकरणले पदमुक्त गर्नु गलत हो म कानूनी उपचार खोज्छु ।' 

पूर्वमाओवादी भएकै कारण हटाउनु गलत भएको उनको भनाइ छ ।  'आशंकाको भरमा पूर्व माओवादीबाट आएको हो फलानो गुटको होला भन्ने कारणले यदि पदमुक्त गरिएको हो भने त्यो दूर्भाग्यपुर्ण हो,' उनले भने, 'पदमुक्त गर्न तथ्य र प्रमाण आवश्यक छ जुन यो सरकारसँग छैन ।'