प्रधानमन्त्रीको कदममा राष्ट्रपतिलाई विवादमा तान्‍न खोजियो : नेम्वाङ

विराटनगर : पूर्वसभामुख तथा नेकपा (ओली समूह)का नेता सुवासचन्द्र नेम्वाङले प्रधानमन्त्री केपी शर्मा ओलीको कदममा राष्ट्रपति विद्यादेवी भण्डारीलाई विवादमा तान्‍ने प्रयास भएको भन्दै आपत्ति जनाएका छन् ।

ओली समूहले शनिबार विराटनगरमा आयोजना गरेका कार्यक्रममा नेम्वाङले भने, ‘प्रधानमन्त्री केपी शर्मा ओलीले गरेको प्रतिनिधि सभा विघटन गर्ने कदम  संविधानसम्मत छ कि छैन भनेर मतहरू प्रकट भए । प्रधानमन्त्रीको कदमलाई लिएर राष्ट्रपतिलाई समेत विवादमा तान्ने प्रयास भयो ।’ 

---

नेम्वाङले आफू कानुनको विद्यार्थी भएकाले प्रतिनिधि सभा विघटन ठीक हो कि बेठीक हो भन्नेबारेमा सर्वोच्चमा रिट परेकाले त्यसको फैसला भएपछि मात्रै बोल्ने बताए । ‘म कानुनको विद्यार्थी हाम्रो संविधानले सर्वोच्च अदालतमा विचाराधीन विषयमा संसद्‍मा बहससमेत गर्न पाइँदैन भनेको छ,’ उनले भने ।

नेम्वाङले सडकमा उत्रिएर जनताले निर्वाचनको पक्षमा फैसला सुनाइसकेको बताए । ‘नेपाली जनताले त अहिले सडकमा उत्रिएर यो समुद्रको लहरजस्तो जनताको जुन लहर सडकमा पोखिएको छ । नेपाली जनताले त फैसला सुनाइसकेका छन् । सम्मानित सर्वोच्च अदालतको फैसला हामी कुरिरहेका छौं’, उनले भने ।

नेम्वाङले प्रधानमन्त्रीले काम गर्न नपाएर प्रतिनिधि सभा विघटन गरेको बताए । ‘प्रधानमन्त्रीको प्रश्न छ, म दुई तिहाईको प्रधानमन्त्रीले काम गर्न नपाएपछि मैले के गर्ने,’ नेम्वाङले भने ।