नेकपा ओली समूहको संसदीय दलको बैठक बस्दै, दाहाल-नेपाल समूहलाई पनि निम्तो

काठमाडौँ  : आफैँले विघटन गरेको संसद् पुनःस्थपना भएपछिको पहिलो बैठकको तयारीको लागि प्रधानमन्त्री केपी शर्मा ओलीले संसदीय दलको बैठक आह्वान गरेका छन् । नेकपाको प्रधानमन्त्री ओली समूहले शनिबार दिउँसो ३ बजेलाई संसदीय दलको बैठक बोलाएको हो । बैठक प्रधानमन्त्रीको सरकारी निवास बालुवाटारमा बस्नेछ । 

शुक्रबार नेकपाकै दाहाल-नेपाल समूहको संसदीय दलको बसिसकेको छ । बैठकले पुष्पकमल दाहाललाई संसदीय दलको नेताको रुपमा चयन गरेको छ ।  नेकपा दाहाल-नेपाल समूहले आफ्नो पक्षमा ११२ जना सांसद रहेको दाबी पनि गरेको छ । दाहाल-नेपालले ओलीविरुद्ध अविश्वासको प्रस्ताव संसद्मा दर्ता गर्ने निर्णय गरिसकेको छ । 

---

दाहाल नेपाल समूहले संसदीय दलको प्रमुख सचेतक देव गुरुङ नै भएको दाबी गरेको छ भने उता ओली समूहले गुरुङलाई कारबाही गरेर विशाल भट्टराईलाई प्रमुख सचेतक बनाइसकेको छ । संघीय संसद् सचिवालयले पनि भट्टराईको नाम ढड्डामा चढाइसकेको छ ।  

आज बस्ने ओली समूहको बैठकले प्रतिनिधि सभाको अधिवेशनमा कसरी प्रस्तुत हुने भन्ने रणनीति तय गर्ने बताइएको छ ।  बैठकमा नेकपाका दाहाल–नेपाल समूहका सांसदहरुलाई पनि निम्तो पठाइएको छ । सांसदहरुलाई एसएमएस पठाएर बैठकमा सहभागी हुन भनिएको छ ।