कटुवा पेस्तोलसहित तीन पक्राउ

बुटवल : रुपन्देहीको मर्चवारबाट हतियारसहित ३ युवा पक्राउ परेका छन् । जिल्ला प्रहरी कार्यालय रूपन्देहीले दिएको जानकारी अनुसार पेस्तोलसहित उनीहरूलाई पक्राउ गरिएको हो । प्रहरीले भारतीय नम्बर प्लेटको मोटरसाइकसहित उनीहरूलाई जिल्लाको मर्चवारी-७ कन्चनापुरबाट पक्राउ गरेको हो ।
 
पक्राउ पर्नेमा रुपन्देही सम्मरीमाई-७ बेतकुइयाका कनै सुरज हरिजन (२४) सोही ठाउँका तौलन हरिजन (२३)  र सम्मरीमाई-७ भुन्डिहवाका सकिल मुसलमान (२६) रहेका छन् ।  जनपद र सशस्त्र प्रहरीको संयुक्त टोलीले उनीहरूलाई पक्राउ गरेको जिल्ला प्रहरी कार्यालय रुपन्देहीले जनाएको छ ।

यूपी ५५ एन ४९४९ नम्बरको भारतीय मोटरसाइकलमा सवार उनीहरूलाई खानतलासी गर्दा गोली नभएको कटुवा पेस्तोल फेला परेको हो । पेस्तोल र मोटरसाइकलसहित नियन्त्रणमा लिइएको उनीहरूमाथि थप अनुसन्धान जारी रहेको प्रहरीले जनाएको छ ।
 

---