डर्टमन्ड च्याम्पियन्स लिगमा छनौट नभए हालान्डको रोजाईमा कुन क्लब ?

काठमाडौँ : जर्मन बुन्डेसलिगामा यस सिजन बोरुसिया डर्टमन्ड संर्घषरत छ । गत सिजन लिग उपविजेता बनेको डर्टमन्ड यस पटक भने पाँचौ स्थानमा रहेको छ । घरेलु लिग उपाधि दौडमा सामेल हुननसकेको डर्टमन्डले च्याम्पियन्स लिगको क्वार्टरफाइनलमा स्थान बनाएको छ ।

च्याम्पियन्स लिगको अन्तिम आठमा स्थान पक्का गरे पनि डर्टमन्डसँग सो प्रतियोगिता जित्ने आत्मविश्वास देखिँदैन । त्यसकारण, डर्टमन्डले च्याम्पियन्स लिग जित्ने लक्ष्य बनाउने भन्दा पनि बुन्डेसलिगाको शीर्षचारमा रहन मेहेनत गर्ने जर्मन क्लबका स्र्पोटिङ निर्देशक माइकल जोर्कले बताएका छन् ।

---

डर्टमन्ड यस सिजन शीर्षचारमा नरहे स्वभाविकरुपमा उसले अर्को सिजनको च्याम्पियन्स लिग गुमाउनेछ । जसका कारण एर्लिङ हालान्ड जस्ता खेलाडीहरूले डर्टमन्ड छाड्न प्रयास गर्नसक्ने जोर्कको स्किारोक्ति छ । 

गत जनवरीमा रेडबुल साल्जबर्गबाट डर्टमन्ड आएका हालान्डले जर्मनीमा निरन्तर गोल गरिरहेका छन् । बुन्डेसलिगामा २० खेलमा १९ गोल गरेका हालान्डले च्याम्पियन्स लिगमा छ खेलमा १० गोल गरेका छन् । यसरी घरेलु लिग तथा च्याम्पियन्स लिगमा डर्टमन्डका लागि बलियो खेल देखाइरहेका हालान्डलाई नगुमाउन आफूहरू सचेत रहेको जोर्कको भनाई छ । 

‘मैले हालान्ड जस्तो अर्को खेलाडी देखेको छैन । युरोपभर खोजी गरे पनि उनी जस्तो खेलाडी पाउन ग्राहो छ । उनलाई अनुबन्ध गर्न धेरै क्लब लालयित छन् । तर हामी उनलाई डर्टमन्डमै राख्न हरसम्भव प्रयास गर्ने छौँ,’ जोर्कले भने । 

रियल म्याड्रिड, म्यानचेस्टर सिटी, पेरिस सेन्ट जर्मेन (पीएसजी) जस्ता क्लब हालान्डलाई खरिद गर्न इच्छुक रहेका छन् । डर्टमन्ड च्याम्पियन्स लिगमा छनौट नहुने हो भने आउँदो सरुवा बजारमा हालान्डले कुनै ठूलो युरोपियन क्लब छान्‍ने सम्भावना धेरै छ । त्यसकारण पनि डर्टमन्ड कुनै हालतमा च्याम्पियन्स लिगमा छनौट हुनुपर्ने दबाबमा छ ।