नारी सशक्तिकरणका लागि महिला बक्सिङ [फाेटाे फिचर]

काठमाडौँ – अन्तर्राष्ट्रिय ‘११२ औँ नारी दिवस’को अवसरमा ठमेलस्थित एलओडी क्लबमा ‘महिला बक्सिङ’ खेल भएको छ। एलओडी क्लब, बक्समान्डु जीम र कान्तिपुर टेलिभिजनमा संयुक्त आयोजनामा बक्सिङ खेल भएको हो ।

प्रतियोगितामा विभिन्न तौल समूह गरी कुल १४ जना खेलाडी सहभागी भए । ४९ केजी देखि ६० केजी समूहका महिला खेलाडीहरू सहभागी भएका हुन् ।

---

खेलाडीहरू प्रतिष्ठा अर्याल, माया गुरुङ, सुस्मा तामाङ, माला राई, अस्मिता दुवा, ललिता महर्जन, मिनु गुरुङ, निशा तामाङ, हेमा राई, सुस्मिता राई, डेचेन पाङकर्मा शेर्पा, नरीका राई, संगीता सुनुवार र पुनम रावल बक्सिङमा सहभागी भएका थिए।

नारी सशक्तिकरणका लागि महिलाहरू पनि सक्षम रहेको सन्देश दिन बक्सिङ आयोजना गरिएको एलओडीका निर्देशक भुपेन शमशेर कुँवरले बताए । महिलाले सामाजिक वा कानूनीरुपबाट भोग्नु परेको भेदभाव हटाउन यस्ता कार्यक्रमले थप बल पुग्ने उनले विश्वास व्यक्त गरे।

महिला सशक्तीकरण, सहभागिता र समानताको विषयमा महिलाको मात्र नभएर समाजकै मुद्दा भएको कुँवरको भनाइ छ । 'महिला सशक्तीकरणका लागि महिला र पुरुष दुवैको समान र सक्रिय भुमिका आवश्यक रहेको छ,' उनले भने ।

बक्सिङमा प्रथम हुनेले ५० हजार रुपैयाँ नगदसहित प्रमाणपत्र प्रदान गरिएको थियो । दोस्रो हुनेले २० हजार र प्रमाणपत्र प्राप्त गरे । बक्सिङमा नेपाली सेनाका खेलाडीले तीन स्वर्ण र एक रजत प्राप्त गरे ।

बक्सिङ खेलमा नेपाली सेनाका सबैभन्दा धेरै खेलाडी सहभागी भएका थिए । सेनाले महिला प्रशिक्षकबाट खेलाडीलाई तालिम प्रदान गरिएको थियो । नेपाली सेनाको त्रिभुवन अफिसर्स क्लबले महिलालाई प्राथमिकता दिएर विभिन्न खेलमा सहभागी गराउने गरेको छ ।