बजेटले जनताको जीवन परिवर्तन गर्न सक्दैन : राजेन्द्र लिङ्देन

काठमाडौं–राष्ट्रिय प्रजातन्त्र पार्टीका अध्यक्ष राजेन्द्र लिङ्देनले सरकारले ल्याएको बजेटले जनताको जीवन परिवर्तन गर्न नसक्ने बताएका छन् । प्रतिनिधिसभाको बैठकमा सरकारले ल्याएको बजेट छलफलमाथि बोल्दै सांसद लिङ्देनले यस्तो बताएका हुन् । 

‘अहिलेको बजेट इमानदारी पूर्वक भन्नुपर्छ यसले हाम्रो जिवन परिवर्तन गर्न सक्दैन,’ उनले भने, ‘देशमा अहिले जुन प्रकारको आर्थिक संकट बढ्दै गएको छ । जुन प्रकारको मूल्य वृद्धि हुँदै गएको छ । त्यसलाई रोक्नेतर्फ उन्मुख छैन ।’

---

सांसद लिङ्देनले  बजेट केवल निर्वाचन लक्षित भएको आरोप लगाए  । ‘बजेट केवल निर्वाचन लक्षित छ,’ उनले भने, ‘आगामी निर्वाचनलाई केन्द्रमा राखेर ल्याइएको छ । यो बजेटको स्रोत के हो ? यसका कार्यान्वयनका आधार के हुन् ? कही पनि स्पष्ट छैन । सँधै झैँ बजेट अनुमान यति आम्दानी हुन्छ होला, यति अनुदान पाइन्छ होला ?यति ऋण लिइन्छ होला ? त्यसको आधारमा बनाइएको छ ।’ 

उनले सरकारले ल्याएका कार्यक्रमको स्रोतहरू नखुलेकाले त्यो जनतालाई भुल्याउन ल्याइएको समेत बताए । ‘बजेटमा कति राम्रो कुरा छ कि १ घण्टामै चितवन पुग्ने,’ उनले भने, ‘तर त्यसका आधार के हुन ? स्रोत के हुन् ? त्यसकारण यी सबैबाट के देखिन्छ भने यो बजेट एउटा ललिपपको रुपमा भुल्याउने कुरा गरेर ल्याइएकाे छ ।’