नागरिकता विधेयकले पितृसत्तात्मक मानसिकतालाई स्थापित गर्ने प्रयत्न गरेको छ : सांसद भट्टराई

काठमाडौँ–नेकपा एमालेकी सांसद् विद्या भट्टराईले सरकारले ल्याएको विधेयकले पितृसत्तात्मक मानसिकतालाई स्थापित गर्ने प्रयत्न गरेको टिप्पणी गरेकी छिन् । उनले शुक्रबार संसद्‍मा जारी नागरिकता विधेयकमाथिको छलफलमा बोल्दै यस्तो टिप्पणी गरेकी हुन् ।

‘हाम्रो संविधानले पितृत्व र मातृत्वलाई एकै प्रकारले व्याख्या गरेको छ,’ उनले भनिन्, ‘तर, अहिले आएको नागरिकता विधेयकले पितृसत्तात्मक स्रोत र मानसिकतालाई पनि फेरि एकपटक स्थापित गर्ने प्रयत्न गरेको छ ।’

---

सरकारले ल्याएको विधेयकबारे थुप्रै विषयमा उनी असहमत रहेको बताइन् । ‘विधेयकमा मेरा केही असहमति छन्,’ उनले भनिन्, ‘पहिलो कुरा कुनै पनि नेपाली नागरिकलाई नागरिकता प्राप्त गर्ने हकबाट बञ्चित गरिने छैन भन्ने कुरालाई हाम्रो संविधानको धारा ११ वैवाहिक अंगीकृत नागरिकताको व्यवस्था छ । त्यसमा संघीय कानुन अनुसार हुने छ भनिएको कुरालाई यस विधेयकमा स्पष्ट रुपमा आएको छैन् । यसलाई फेरि हामीले हेर्नुपर्छ ।’

यस्तै उनले वंशीय आधार र लैङ्गिक पहिचानको विषयमा पनि विधेयकले स्पष्ट नपारेको बताइन् । ‘दोस्रो कुरा खासगरी वंशीय आधार र लैङ्गिक पहिचान सहितको नागरिकताको जुन सवाल छ,’ उनले भनिन्, ‘यो संविधानको धारा १२ मा छ । यसमा पनि स्पष्ट रुपमा आएको छैन । यसले पनि केही प्रश्नहरू खडा गरेको छ ।’

उनले नेपाली नागरिकसँग विवाह गर्ने विदेशी नागरिकको हकमा पारस्परिक समानता र अन्तर्राष्ट्रिय प्रचलनको मान्यतालाई नस्वीकारेको भन्दै प्रश्न उठाइन् ।