नागरिकता विधेयक समानताको हक विपरीत छ : सांसद पाण्डे

काठमाडौँ–नेकपा एमालेकी सांसद बिन्दा पाण्डेले सरकारले ल्याएको नागरिकता विधेयक समानताको हक विपरीत भएको बताएकी छिन् । उनले संसद्‍मा जारी नागरिकता विधेयकमाथिको छलफलमा यस्तो बताएकी हुन् । 

‘यो विधेयक समानताको हक विपरीत छ,’ उनले भनिन्, ‘जसले महिलाको दम्पतीको चयन, पैतृक सम्पत्तिको कबोल, वासस्थानको चयन जस्ता परिवारको आधारभूत हकको हनन् गरेको छ । विद्यमान नागरिकता कानुनले छोरीको विदेशी दम्पतीलाई आफ्नो र विदेशीसँग विवाह गर्ने छोरीलाई पराइको व्यवहार गर्दै परिवार सहित बस्ने हो भने देश निकाला भएर जाउ भन्ने भाव बोकेको छ । यी विषयमा यो विधेयक मौन छ ।’

---

उनले विधेयकमा समानताको कुरा उठाउँदै सरकार, संसद् र दललाई प्रश्न गरिन् । ‘हामी समाजवादको कस्तो मोडल र सामाजिक न्याय स्थापित गर्न खोज्दै छौँ ?,’ उनले भनिन्, ‘ कुन मान्यतामा उभिएर लैङ्गिक समान नागरिक हैसियतको कुरा गर्न सक्छौँ ? यो प्रश्न सरकार, संसद र सबै दललाई हो ?’