मतगणना छाडेर गगन थापा सिनेमा हेर्न हलतिर

काठमाडौँ -  प्रतिस्पर्धी उम्मेदवारबाट कडा टक्कर भेटिइरहेका नेपाली कांग्रेसका महामन्त्री तथा काठमाडौँ ४ प्रतिनिधि सभा उम्मेदवार गगनकुमार थापा मतगणना चलिरहँदा सिनेमा हल पुगेका छन् । उनले सामाजिक सञ्जालमा सिनेमा हललाई पृष्ठभूमिमा राख्दै श्रीमतीसहितको तस्बिर सार्वजनिक गर्दै थकान मेट्न सिनेमा हल आएको बताएका छन् । धेरै दिनको दौडधुप पछि आजको फुर्सद  उनले लेखेका छन् । गगन श्रीमती अन्जना केसीसहित दरबारमार्गस्थित क्युएफएक्स हल गएका हुन् ।  

तेस्रो पटक निर्वाचन जित्दै प्रतिनिधि सभा सांसद बन्ने अभियानमा रहेका गगनलाई एमालेका राजनकुमार भट्टराईले कडा चुनौती दिइरहेका छन् । केही सर्वेक्षणले उनले भारी मतान्तरसहित जित्ने आंकलन गरे पनि प्रारम्भिक परिणामले उनी र एमाले उम्मेदवारबीच कडा प्रतिस्पर्धा हुने संकेत देखिएको छ । प्रारम्भिक मत परिणाममा गगन प्रतिस्पर्धीभन्दा ४ सय मतले मात्र अगाडि छन् । 

---