प्रधानमन्त्री प्रचण्डलाई २६८ सांसदले दिए विश्वासको मत

काठमाडौँ– प्रधानमन्त्री पुष्पकमल दाहाल ‘प्रचण्ड’लाई २ सय ६८ सांसदले विश्वासको मत दिएका छन् । मंगलबार प्रधानमन्त्री दाहालले विश्वासको मतका लागि संसद्‍मा प्रस्ताव पेश गरेका थिए । उनको प्रस्तावमा छलफल सकेपछि मतदान भएको थियो ।

मतदानमा २७० सांसद उपस्थित थिए ।

---

दाहालको पक्षमा २ सय ६८ मत परेको छ भने २ मत मात्रै विपक्षमा परेको छ ।

प्रधानमन्त्री दाहाललाई नेकपा एमाले, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी, नागरिक उन्मुक्ति पार्टी र जनमत पार्टीले समर्थन गरेर हस्ताक्षर राष्ट्रपतिलाई बुझाएका दिए ।

त्यसबाहेक दाहाललाई प्रधानमन्त्रीमा समर्थन नगरेको दल कांग्रेसले पनि विश्वासको मत दिएको छ । दाहाललाई विश्वासको मत दिने/नदिने विषयमा कांग्रेसभित्र पादाधिकारीबीच मत बाझिएको थियो । तर, पार्टीको केन्द्रीय कार्यसम्पादन समितिले विश्वासको मत दिने निर्णय गरेको थियो । 

राष्ट्रिय जनमोर्चा, नेपाल मजदुर पार्टीले दाहाललाई विश्वासको मत नदिने घोषणा गरेका थिए । 

प्रतिनिधिसभाका सभाको अर्को बैठक माघ ५ गते बिहीबार बिहान ११ बजेका लागि बोलाइएको छ ।