गुलरिया-मूर्तिया नाका तत्काल संचालनमा ल्याउन सरकारसँग माग

काठमाडौँ- नेपाली कांग्रेसका सांसद सञ्जयकुमार गौतमले गुलरिया–मूर्तिया नाका तत्काल संचालनमा ल्याउन सरकारसँग माग गरेका छन् ।

१४ वर्ष अघि नेपाल–भारतबीच उक्त नाका संचालन गर्ने सहमति भए पनि त्यसको अझै कार्यान्वयनमा ल्याउन सरकार तयार नभएकोमा सांसद गौतमको आपत्ति छ । शुक्रबार प्रतिनिधिसभा बैठकमा विशेष समय लिएर बाेल्दै उनले सो नाका संचालनका लागि भारत सरकारसँग पनि आग्रह गरे ।

---

सांसद गौतमले छोटी भन्सारहरूको उचित व्यवस्था गर्न पनि सरकारको गम्भीर ध्यानाकर्षण गराए । छोटी भन्सारलाई अस्तव्यस्त बनाएर सरकार आफैँले चोरी पैठारीलाई प्रश्रय दिएको आशंका समेत उनले व्यक्त गरे ।

सांसद गौतमले अर्थतन्त्र कमजोर भइरहेका बेला भन्सार कार्यालयको व्यवस्थापन गर्न पनि सरकार गम्भीर नभएको भन्दै आपत्ति समेत जनाए ।