एमाले-कांग्रेस दुवैले प्रतिपक्षीमा बस्‍ने अडान लिएपछि संसद् बैठक सर्‍यो

काठमाडौँ - प्रतिपक्षीमा बस्ने विषयमा विवाद भएपछि प्रतिनिधि सभा बैठक सरेको छ । नेपाली कांग्रेस र नेकपा एमाले दुवैले प्रतिपक्षीमा बस्ने अडान लिएपछि संसद् बैठक सरेको हो । 

प्रतिपक्षीमा बस्ने दलहरू धेरै भएपछि कुर्सी व्यवस्थापन नभएको भन्दै बैठक सारिएको संसद् सचिवालय स्रोतले जनाएको छ । सचिवालयका एक कर्मचारीका  अनुसार दलहरूले समेत प्रतिपक्षमा बस्ने व्यवस्था नभएसम्म बैठक सार्न दबाब दिएका थिए । 

---

आज बस्ने तय भएको बैठक अब चैत ५ गते मात्रै बस्ने तय भएको संसद सचिवालयले जनाएको छ । 

पुष्पकमल दाहाल प्रचण्ड नेतृत्वको सरकारलाई विश्वासको मत दिएको कांग्रेस र विश्वासको मत फिर्ता लिएका एमाले दुवै प्रतिपक्षको मञ्चमा बस्ने अडान लिएका थिए ।

प्रचण्ड नेतृत्वको सरकारलाई दिएको समर्थन र सरकारबाट बाहिरिएसँगै एमाले भने प्रतिपक्षमा बस्ने संसद् सचिवालयलाई जानकारी गराएको थियो ।

राप्रपा र एमाले सरकारबाट बाहिरिएसँगै सरकारलाई दिएको समर्थनसमेत फिर्ता लिइसकेका छन् । 

राप्रपाको पनि प्रतिपक्षीमा बस्ने तयारी छ । 

रास्वपा यसअघि नै सरकारबाट बाहिरिसकेको छ । यद्यपि रास्वापाले सरकारलाई दिएको समर्थन भने कायमै राखेको छ ।