किन गरे शेखरले प्रधानन्यायाधीशलाई तल राखेर प्रस्ताव गरिएको विधेयकप्रति आपत्ति ?

काठमाडौँ- सांसद शेखर कोइरालाले मर्यादाक्रममा सभामुख र राष्ट्रिय सभाको अध्यक्ष भन्दा प्रधानन्यायाधीशलाई तल राखेर प्रस्ताव गरिएको विधेयकप्रति आपत्ति जनाएका छन् । उनले सामाजिक सञ्जाल फेसबुकमा स्टाटस लेख्दै प्रधान न्यायाधीशलाई मर्यादाक्रममा सभामुख र राष्ट्रियसभाको अध्यक्ष भन्दा तल राखेर प्रस्ताव गरिएको विधेयक संविधान विपरीत रहेको भन्दै टिप्पणी गरेका हुन् ।

संविधानको धारा २८४ ले प्रधान न्यायाधीशलाई सभामुख र राष्ट्रियसभा अध्यक्ष भन्दा माथि मर्यादाक्रममा राखेको छ । कोइरालाले लोकतान्त्रिक मुलुकहरुमा पनि प्रधानन्यायाधीशको मर्यादाक्रम यही अनुरुप रहेको स्मरण गराएका छन् ।

---

‘संविधान निर्माणका समयमा तत्कालीन माओवादीले न्यायालयलाई संसदीय समिति अन्तर्गत राख्ने प्रस्ताव राखेको थियो,’ उनले भनेका छन्,’  तर नेपाली कांग्रेसले शक्ति पृथकीकरणको सिद्धान्त विपरीत जान हुँदैन भन्दै न्यायालयलाई स्वतन्त्र राख्नुपर्ने अडान राखेको थियो र त्यही अनुरुप भयो ।‘