संसदमा अर्थमन्त्री महतको जवाफ : इमान्दार भएर काम गर्दा प्रश्नमाथि प्रश्न उठ्दो रहेछ

काठमाडौँ– अर्थमन्त्री प्रकाशशरण महतले बजेट निर्माणमा आफूले अनियमितता नगरेको जिकिर गरेका छन् । बजेट निर्माणका क्रममा करका दर हेरफेरमा पूर्व नासु रामकृष्ण श्रेष्ठलाई संलग्न गराएको भन्ने उनीमाथि लागेको आरोपलाई खण्डन गर्दै मंगलबार संसदमा उनले आफूले इमान्दार भएर काम गरेको बताए । 

‘इमान्दार भएर काम गर्न कति कठिन हुँदो रहेछ । इमान्दार भएर काम गर्दा प्रश्नमाथि प्रश्न उठ्दो रहेछ,’ उनले भने, ‘एउटा पत्रिकाले एउटा न्यूज पटकपटक दोहोर्याउँछ । त्यसैलाई हामी सत्य ठान्दछौँ । तर, वास्तविकता के हो भने पारदर्शी ढंगबाट कुनै पनि प्रभावबाट मुक्त भएर मैले काम गरेको छु ।’

---

आर्थिक वर्ष २०८०–८१ को बजेट निर्माणका क्रममा करका दर हेरफेर गर्न पूर्व नासु श्रेष्ठलाई संलग्न गराएकाे भन्दै सांसदहरूले विरोध गरेका हुन् । यसै कारणले मंगलबारको बैठक निर्धारित समयभन्दा दुई घण्टा ढिलो सुरु भएको थियो ।