संसदमा सुवालको आक्रोश : सरकारी मिडियामा खाली सरकार र मन्त्रीहरूको मात्रै आउने ?

काठमाडौँ– नेपाल मजदुर किसान पार्टीका सांसद प्रेम सुवालले सरकारले सरकारी सञ्चार माध्यमहरूलाई सत्तारूढ दलहरूको मुखपत्रको संज्ञा दिएका छन् । सोमबारको प्रतिनिधिसभामा बजेटमाथिको छलफलमा भाग लिँदै सुवालले सञ्चारमन्त्रीले सरकारी स्वामित्वमा रहेका सञ्चार माध्यमहरू गोरखापत्र, रेडियो नेपाल र नेपाल टेलिभिजनलाई सरकार र मन्त्रीहरूको मात्रै प्रचार गर्न निर्देशन दिएको भन्दै आक्रोशसमेत व्यक्त गरे ।

‘खाली सरकारी पार्टीको, मन्त्रीहरूको मात्रै आउने, अरु कोही छैन यहाँ ? १३ वटा दल छन् संसदमा । अरुको केही सुन्नै नपाउने । सञ्चारमन्त्रीज्यूले सबै चिज सरकारको मात्रै प्रचार गर्नु भनेर निर्देशन दिन मिल्छ ?’ उनले भने । 

---

सुवालले खुमलटारस्थित रेडियो नेपालको ५० औं रोपनी जग्गा बिक्री गरेर करोडौं कमीसन खाने काम भएको बताए । त्यस्तो गतिविधिमा संलग्नहरूलाई कडा कारबाहीको माग गर्दै उनले भने, ‘रेडियो नेपालको खुमलटारस्थित ५० औं रोपनी जग्गा बिक्री गरेर करोडौं कमीसन खाने को–को हो ? कारबाही हुनुपर्यो ।’

उनले सञ्चार तथा सूचना प्रविधि मन्त्रालय, परराष्ट्र मन्त्रालय र ऊर्जा, जलस्रोत तथा सिँचाइ मन्त्रालयमा खर्च कटौतीको प्रस्ताव पनि पेस गरेका छन् । 

सोमबार संसदमा सञ्चार तथा सूचना प्रविधि मन्त्रालय, परराष्ट्र मन्त्रालय र ऊर्जा, जलस्रोत तथा सिँचाइ मन्त्रालयको विनियोजन शीर्षकमाथिको छलफल चलिरहेको छ ।