बैंकलाई ब्याजदर घटाउन सांसद चौधरीको माग

काठमाडौँ– नेकपा (एकीकृत समाजवादी) सांसद मेटमणि चौधरीले सरकारसँग बैंकको ब्याजदर तत्काल घटाउन माग गरेका छन् । मंगलबारको प्रतिनिधिसभा बैठकमा बोल्दै एकीकृत समाजवादीका प्रमुख सचेतकसमेत रहेका चौधरीले मुलुकको अर्थतन्त्रलाई ठीक अवस्थामा ल्याउन बैंक ब्याजदर तत्काल घटाउनुपर्ने बताए । 

‘हामी निक्षेप बढेको छ भनिरहेका छौँ । तर, कर्जा प्रवाह कम छ । यसको एउटा कारण लगानीको वातावरण बन्न नसक्नु हो । दोस्रो, हामीले थोरै ब्याजदर बनाउन सकिरहेका छैनौँ,’ उनले भने, ‘माननीय अर्थमन्त्रीज्यू तपाईं यसमा गम्भीर हुनुस् । यदि तपाईंले ब्याजदर घटाउन सक्नुभएन भने फाइनान्सियल सेक्टरलाई हराभरा बनाउन सक्नुहुन्न । त्यसैले, बैंक ब्याजदर घटाउनुस् ।’​

---

मंगलबार प्रतिनिधिसभा बैठकमा सहरी विकास मन्त्रालय, अर्थ मन्त्रालय, खानेपानी मन्त्रालय र श्रम, रोजगार तथा सामाजिक सुरक्षा मन्त्रालयको विनियोजन शीर्षकमाथि छलफल चलिरहेको छ ।