प्रतिनिधिसभाको आजको बैठक स्थगित

काठमाडौँ– प्रतिनिधिसभाको आजको बैठक स्थगित भएको छ । अर्को बैठक असार २९ गते बस्ने गरी स्थगित भएको हो ।  

सोमबारको बैठकमा प्रधानमन्त्री पुष्पकमल दाहाल 'प्रचण्ड'ले विवादित अभिव्यक्तिमाथि स्पष्टीकरण दिए । उनले भावनामा बगेर आफूले त्यो अभिव्यक्ति दिएको र प्रधानमन्त्रीका रूपमा त्यस्तो अभिव्यक्ति दिन नहुने भन्ने आत्मबोध भएको बताए । 

---

असार १८ गते प्रचण्डले सरदार प्रितम सिंहको पुस्तक विमोचन कार्यक्रममा सिंह आफूलाई प्रधानमन्त्री बनाउन पटक–पटक दिल्ली गएको भनी अभिव्यक्ति दिएका थिए । त्यसलाई लिएर एमालेले बुधबारदेखि प्रतिनिधिसभा र राष्ट्रियसभा दुवै सदन अवरुद्ध पारेको थियो । एमालेले प्रधानमन्त्रीले राजीनामा नदिएसम्म संसद् चल्न नदिने बताउँदै निरन्तर अवरोध गर्दै थियो । 

आइतबार दिउँसो प्रधानमन्त्री प्रचण्डसहित प्रमुख दलका शीर्ष नेताबीच बसेको बैठकबाट संसद् अवरोध हटाउने सहमति भएको थियो ।