संघीय व्यवस्थामाथि नै प्रश्न उठ्न थालेको छ : सभामुख घिमिरे

काठमाडौँ- सभामुख देवराज घिमिरेले संघीय व्यवस्थामाथि नै प्रश्न उठ्न थालेको बताएका छन् ।

शुक्रवार संघीय संसद् सचिवालयले काठमाडौँमा आयोजना गरेको संघीय संसद् र प्रदेश सभाको अनुभव आदान–प्रदान एवं अन्तरक्रिया कार्यक्रमको उद्घाटन सत्रलाई सम्बोधन गर्दै सभामुख घिमिरेले संघीयताको विषयमा प्रश्नहरू उठ्न थालेको बताएका हुन । संघीयता उचित भएन र संघीयताले जनताको आवश्यकता पूर्ति भएन भन्ने टीकाटिप्पणी हुन थालेको उनले जिकिर गरे ।

---

सभामुख घिमिरेले संविधानको यो व्यवस्थामाथि नै छलफल हुनुपर्ने माग समेत आउन थालेको भन्दै संघ र प्रदेश सभाहरूले जनआंकाक्षा अनुरूपको ऐन, कानुन बनाउनुपर्ने बताए । उनले संघीय लोकतान्त्रिक गणतान्त्रिक व्यवस्था जनताले चाहेको व्यवस्था हो र यो व्यवस्था राष्ट्रको हितमा छ भन्ने कुरा तीनै तहको सरकारले स्थापित गराउनुपर्ने बताए ।

उनले जनताको अपेक्षा पूरा गर्ने गरी कानुन बनाउनुपर्नेमा जोड दिए । जनपक्षीय कानुन बनाउनका लागि संघ र प्रदेश सभा र सांसदहरू सिर्जनशील हुनुपर्ने बेला आएको उनकाे भनाइ छ । सभामुखहरूले सभालाई ठीक ढंगले सञ्चालन गर्नुपर्नेमा उनले जोड दिए ।