काठमाडौँ– सोमबारको प्रतिनिधि सभाको बैठकमा इजरायलमा रहेका नेपालीहरूको तत्काल उद्धार गर्न सांसदहरूले माग गरेका छन् । प्रतिनिधिसभाको शून्य समयमा बोल्ने अधिकांश सांसदहरूले इजरायलमा अलपत्र परेका नेपालीको  तत्काल उद्धार सरकारको ध्यानाकर्षण गराएका हुन् । 

प्रतिनिधिसभा सदस्य अन्जनी श्रेष्ठले इजरायलमा अलपत्र नेपालीको यथाशिघ्र उद्धार गर्न माग गरिन् । ‘इजरायलको आक्रमणमा १० जना नेपालीको मृत्यु भइसकेको, कतिपय नेपालीहरू घाइते भइसकेको खबर कतिपय सम्पर्कविहीन भएको खबरले हामी मर्माहित छौँ,’ उनले भनिन्, ‘मृतक परिवारलाई कसरी मलहम पट्टी लगाउने ?’

---

उनले आक्रमणमा परि घाइते भएका र अलपत्र परेका नेपालीलाई तत्काल उद्धार गर्न सरकार र मन्त्रालयलाई अनुरोध गरिन् । सांसद अनिसा नेपाली र अब्दुल खानले इजरायलमा मृत्यु भएकाहरूको परिवारलाई समवेदना व्यक्त गर्दै अलपत्र भएकाहरूको उद्धार गर्न सरकारसँग माग गरे । 

सांसद अमनलाल मोदीले अलपत्रहरूको कूटनीतिक पहल गरी उद्धार गर्न माग गरे । अर्जुन नरसिंह केसीले इजरायलको आक्रमणमा परि अलपत्र परेका नेपालीको तुरुन्त उद्धार गर्न माग गरेका छन् ।

‘इजरायलमा सिक्दै कमाउमा गएका नेपालीको आक्रमणमा परि निधन भएको छ,’ उनले भने, ‘१० जना मृतकको शवलाई तुरुन्त काठमाडौँ ल्याउने काम होस् । धेरै जना नेपाल फर्किन अनुरोध गरिरहेका छन् । इजरायलमा रहेका नेपालीको यकिन गरि घाइते भएका स्वास्थ्य उपचारको व्यवस्था र नेपाल फर्काउनको निम्ति सरकारले तत्काल युद्ध स्तरमा काम गरोस् ।’

उनले त्यहाँको पछिल्लो अवस्था र विस्थापित नेपालीको संख्याबारे संसदमा जानकारी गराउन पनि सरकारलाई अनुरोध गरे । त्यस्तै सांसद असिम शाहले नेपाली आक्रमणमा पर्नुमा नेताहरू पनि उत्तिकै जिम्मेवार रहेको बताए ।

यस्तै सांसदहरू एकनाथ ढकाल, गीता बस्नेत, चित्रबहादुर केसी, जनार्दन शर्मालगायतका अधिकांश सांसदले नेपालीको उद्धार गर्न  सरकारको ध्यानाकर्षण गराएका छन् ।