संक्रमणकालीन न्यायसम्बन्धी विधेयकबारे शीर्ष नेताहरूसँग छलफल गर्नुपर्छ : मन्त्री गुरुङ

काठमाडौँ– कानुन, न्याय तथा संसदीय मामिला मन्त्री धनराज गुरुङले संक्रमणकालीन न्यायसँग सम्बन्धित विधेयकको विषयमा शीर्ष नेताहरूसँग छलफल गरेर अगाडि बढ्नुपर्ने बताएका छन् । ​मंगलबार प्रतिनिधिसभा अन्तर्गतको कानुन, न्याय तथा मानव अधिकार समितिको बैठकमा बोल्दै मन्त्री गुरुङले यस्तो बताएका हुन् ।

‘यसमा छलफल गरेर हामी अगाडि बढ्ने हो,’ उनले भने, ‘शीर्ष नेताहरूसँग पनि हामी छलफल गर्दै अगाडि बढ्ने हो । अप्ठ्यारो पर्यो भने सोध्ने न हो । अप्ठ्यारो पर्यो भने छोराछोरीले बा, आमालाई सोध्छन् नि त कहिलेकाहीँ । किन लजाउनुपर्यो ।’

---

समितिको बैठकमा बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग ऐन, २०७१ लाई संशोधन गर्न बनेको विधेयकमाथि दफावार छलफल गरी समितिसमक्ष प्रतिवेदन पेस गर्न गठित उपसमितिले प्रतिवेदन पेस गरेको छ ।

मन्त्री गुरुङले विधेयक समितिले छलफल गरी पारित गर्नुपर्ने भन्दै अप्ठ्यारो परेको अवस्थामा दलका शीर्ष नेताहरूसँग छलफल गरेर अगाडि बढ्नुपर्ने बताए । शीर्ष नेताहरूसँग छलफल गरेता पनि निर्णय भने समितिको नै हुने उनको भनाइ थियो । 

मन्त्री गुरुङले तत्कालीन राज्य पक्ष र विद्रोहीबीचमा भएको वृहत् शान्ति सम्झौतालाई मध्यनजर गर्दै विधेयक पारित गर्नु पर्नेसमेत बताए ।