मिडिया काउन्सिललाई आमसञ्‍चार परिषद् बनाउन सहमत - मन्त्री गुरुङ

काठमाडौँ - सञ्चार तथा सूचना प्रविधिमन्त्री पृथ्वी सुब्बा गुरुङले मिडिया काउन्सिललाई आमसञ्चार परिषद् बनाउन सहमत रहेको बताएका छन् । 

विधायन व्यवस्थापन समितिको मंगलबारको बैठकमा मन्त्री गुरुङले मिडिया काउन्सिल विधेयक, २०८० को नाम परिवर्तन गर्दै आमसञ्चार परिषद् विधेयकका रुपमा अघि बढाउन सहमत रहेको बताएका हुन् । 

---

उनले विधेयकको अन्तरवस्तुमा फरक नपर्ने गरि मिडिया काउन्सिललाई नेपालीमा आमसञ्चार परिषद् बनाउन सकिने बताए ।  विधेयकको सार एउटै रहेको र भाषा मात्रै फरक राख्न सहमत भएको उनले बताए । 

उनले यसअघिको प्रेस काउन्सिलले एउटै मात्र क्षेत्रको प्रतिनिधित्व गर्ने देखिएकाले सबै प्रकारका सञ्चारमाध्यमलाई एउटै छातामुनी ल्याउन मिडिया काउन्सिल ल्याइएको धारणा राखे । 

मन्त्री गुरुङले विवादित अन्य विषयमा सहमति जुटाइ विधेयकलाई छिटै अघि बढाउन आग्रह गरे । अध्यक्ष र सिफारिस समितिको संयोजक चयनको प्रक्रिया लगायतका विषयमा समितिमा सहमति जुट्न सकेको छैन ।