दीनानाथ शर्माको प्रश्न : संसद् विघटन गरेर 'गिनिज बुक'मा नाम लेखाउने हो कि ?

काठमाडौँ : माओवादी केन्द्र संसदीय दलको नेता दीनानाथ शर्माले सरकार र सत्तारुढ पार्टी पूर्ण रुपमा असफल भएको बताएका छन् । राष्ट्रिय सभा आठौँ अधिवेशनको पहिलो बैठकलाई सम्बोधन गर्दै बिहीबार शर्माले यस्तो बताएका हुन् ।

'मुलुकमा कोभिड महामारीको संकट छ । त्यो संकटभन्दा ठूलो संकट प्रतिगमनको संकट हो', सम्बोधनका क्रममा उनले भने,'हामीलाई सुरुमा दुई तिहाइको दम्भ देखायौँ । त्यसपछि हामीले न पार्टी जोगाउन सक्यौँ, न जनप्रतिनिधि संस्थालाई जोगाउन सक्यौँ । हामी असफल भयौँ ।'

---

सम्बोधनकै क्रममा शर्माले धेरै पटक संसद् विघटन गरेर गिनिज बुकमा नाम लेखाउन खोजेकोसमेत टिप्पणी गरे । 'गिनिज बुकमा नाम लेखाउने कुरा हो कि, एउटै प्रधानमन्त्रीले पटक-पटक संसद् विघटन गरेको इतिहास छ कि ? अब तेस्रो पटक संसद् विघटन भयो भने गिनिज बुकमा नाम लेखिनेछ । नेपालको नाम उच्च हुनेछ । यसरी नेपालको नाम उच्च बनाउनु छैन ।'

साथै उनले अन्त्यमा भने,'राष्ट्रिय सभाको अधिवेशन सुरु भएको छ दुईचार दिनमा अन्त्य नहोस् ।'