संसदीय समितिमा खतिवडाविरुद्ध तीनवटा उजुरी

काठमाडौं : पूर्वअर्थमन्त्री तथा अमेरिकाका लागि प्रस्तावित राजदूत डा. युवराज खतिवडाविरुद्ध संसदीय समितिमा तीनवटा उजुरी परेका छन् । संसदीय सुनुवाई समितिमा खतिवडाविरुद्ध तीनवटा उजुरी परेको समिति सभापति लक्ष्मणलाल कर्णले जानकारी दिए । 

सरकारले अमेरिका, बेलायत र दक्षिण अफ्रिकाका नयाँ राजदूत नियुक्तिका लागि प्रस्ताव गरेको थियो । उक्त प्रस्ताव संसदको संसदीय सुनुवाई समितिमा पुगेपछि दश दिनको म्याद राख्दै असोज २१ मा उजुरी गर्न आह्वान भएको थियो ।

---

प्रस्तावित राजदूतविरुद्ध परेका उजुरीहरुमाथि समितिले सोमबारदेखि अध्ययन थालेको हो । खतिवडाविरुद्ध तीनवटा उजुरी परेपछि समितिले उजुरीकर्तालाई थप प्रमाणसहित १७ गते उपस्थित हुन आग्रह गर्ने भएको छ ।

त्यस्तै, बेलायतका लागि प्रस्तावित राजदूत पूर्व मुख्यसचिव लोकदर्शन रेग्मीविरुद्ध एउटा उजुरी परेको समितिले जनाएको छ ।