स्वर्णिम वाग्ले चितवनबाट संसदीय निर्वाचनमा उठ्ने

काठमाडौँ– राष्ट्रिय योजना आयोगका पूर्वउपाध्यक्ष डा. स्वर्णिम वाग्ले चितवन–१ बाट संघीय प्रतिनिधिसभा निर्वाचनमा उठ्ने सम्भावना बलियो बनेको छ । वाग्लेले चितवन–१ वा काठमाडौँ–५ का दुई विकल्पमध्ये एक ठाउँबाट निर्वाचनमा प्रतिस्पर्धा गर्न तयार रहेको बताएका छन् । यद्यपि चितवन–१ को लागि नेपाली कांग्रेसले उनलाई टिकट दिने सम्भावना बलियो बनेकाले उनी चितवनबाट उम्मेदवार बन्ने नेपाली कांग्रेसका एक पदाधिकारीले बताए ।

अघिल्लो संसदीय निर्वाचनमा एमालेका वरिष्ठ उपाध्यक्ष ईश्वर पोखरेल काठमाडौँ–५ र एमालेका उपाध्यक्ष सुरेन्द्र पान्डे चितवन–१ निर्वाचित भएका थिए । 

---

वरिष्ठ अर्थशास्त्री वाग्ले अहिले न्यूयोर्कस्थित संयुक्त राष्ट्रसंघीय विकास कार्यक्रम (यूएनडीपी)को एसिया तथा प्रशान्त क्षेत्रीय ब्यूरोमा प्रमुख आर्थिक सल्लाहकारका रूपमा कार्यरत छन् । उनी भदौमा नेपाल फर्कदैंछन् । 

२०७१ देखि २०७४ सम्म नेपालमा रहेर वाग्लेले राष्ट्रिय योजना आयोगको सदस्य र उपाध्यक्षका रूपमा काम गरेका थिए । उनले योजना आयोगमा रहेर राष्ट्रिय विकास रणनीति, सार्वजनिक नीति निर्माण, ठूला परियोजनाहरूको अनुगमनका साथै अन्तर्राष्ट्रिय फोरमहरूमा मन्त्रीस्तरीय प्रतिनिधिमन्डलको नेतृत्व गरेका थिए । 

नेपालमा महाभूकम्प गएको वर्ष २०७२ सालमा उनको अगुवाइमा विपद् पश्चातको आवश्यकता आँकलन (पीडीएनए) भएको थियो । जसको आधारमा नेपालले पुनःस्थापना र पुनःनिर्माणका लागि ४ अर्ब अमेरिकी डलर बराबरको विकास सहायता जुटाएको थियो ।

वाग्लेसँग अन्तर्राष्ट्रिय विकासका क्षेत्रमा दुई दशकभन्दा लामो अनुभव छ । राष्ट्रिय योजना आयोगको सदस्यका रूपमा नेपाल फर्कनुअघि वाग्ले विश्व बैंकको वाशिंगटनस्थित मुख्यालयमा वरिष्ठ अर्थशास्त्रीका रूपमा कार्यरत थिए । त्यसअघि उनले यूएनडीपीकै वरिष्ठ अर्थशास्त्रीका रूपमा मुख्यालय न्यूयोर्क, भियतनामको राजधानी हनोइ र श्रीलंकाको राजधानी कोलम्बोमा रहेर काम गरेका थिए । 

दक्षिण एसियाली थिंकट्यांक सर्वांगिण विकास अध्ययन केन्द्र (आईआईडीएस)को अध्यक्ष समेत रहेका वाग्ले काठमाडौँ विश्वविद्यालयको सिनेटमा र अन्य गैर–नाफामूलक संस्थाको सल्लाहकार समेत रहेका छन् । उनी विश्व बैंकको दक्षिण एसिया ‘च्याम्पियनिङ एन्ड भिजनिङ प्रोसेस’का विशिष्ट सदस्य समेत हुन् । 

वाग्लेको लेखनमा हालै 'द ग्रेट अपहिभल' र 'अतृप्त अवसर' पुस्तक प्रकाशन भएका छन् । वाग्लेले सन् २०१३ मै  ‘द राइज अफ साउथ’ शीर्षकमा प्रकाशित विश्व मानव विकास प्रतिवेदनको सहलेखन गरेका थिए । सन् २००२ देखि सन् २००७ सम्म उनले यूएनडीपी एसिया ट्रेड इनिसियटीभमा नेतृत्वदायी भूमिका निर्वाह गरेका थिए ।

गोर्खामा जन्मेका वाग्लेले अष्ट्रेलियन नेशनल युनिभर्सिटीबाट अर्थशास्त्रमा विद्यावारिधी, अमेरिकाको हार्भर्ड विश्वविद्यालयबाट अन्तर्राष्ट्रिय विकासमा स्नातकोत्तर गरेका हुन् । उनले स्नातक तहको अध्ययन –बीएस्सी (इकोनोमिक्स) लन्डन स्कुल अफ इकोनोमिक्सबाट गरेका हुन् ।