मुलुकको समृद्धिका लागि एमालेले चुनाव जित्नैपर्छ – अध्यक्ष ओली

काठमाडौँ - नेकपा (एमाले)का अध्यक्ष केपी शर्मा ओलीले ‘समृद्ध नेपाल र सुखी नेपाली’को राष्ट्रिय आकांक्षा पूरा गर्न एमालेले चुनाव जित्नुपर्ने धारणा राखेका छन् । 

आज पोखरामा सुरु भएको नेपाल लोकतान्त्रिक तमु  संघ दोस्रो राष्ट्रिय सम्मेलन उद्घाटन गर्दै उनले भने `देश र जनताका साथै विकासका र समृद्धिका लागि एमालेले चुनाव जित्नुपर्छ ।` 

---

अध्यक्ष ओलीले लोकतन्त्रलाई सही गन्तव्यमा डोर्‍याउन र संविधान कार्यान्वयन गर्नका लागि पनि आगामी निर्वाचनमा एमालेको दरिलो उपस्थिति हुनुपर्ने औँल्याए । 

उनले बहुदलीय परिपाटीमा हुने नियमित प्रक्रियाको चुनाव जस्तो नभएर आगामी चुनाव देशमा समृद्धि ल्याउन तथा संविधान कार्यान्वयन गर्न महत्वपूर्ण रहेको पनि बताए । 

जनताले आत्मविश्वास गुमाउँदा देश अप्ठ्यारोमा पर्ने उल्लेख गर्दै अध्यक्ष ओलीले त्यस्तो स्थिति आउन दिन नहुने बताए । उनले विकास र समृद्धिको राष्ट्रिय संकल्प हासिल गर्न सबै पक्षलाई एकताबद्ध हुन आग्रह गरे । रासस