घनश्याम भुसालले प्रचण्डलाई भनेका थिए- तपाईंहरूले सहयोग गरे स्वतन्त्र चुनाव उठ्‍छु नत्र उठ्दिनँ

काठमाडौँ- नेकपा एमाले परित्याग गरेका घनश्याम भुसालले रुपन्देही-१ मा सत्ता गठबन्धनको सहयोगमा आफू स्वतन्त्र उम्मेदवार बन्‍ने बताएका छन् । आइतबार बिहान इकागजसँग कुरा गर्दै भुसालले सत्ता गठबन्धनको सहयोगमा आफूले स्वतन्त्र उम्मेदवारी दिन लागेको बताएका हुन् ।

'मैले प्रचण्डलाई तपाईंहरूले सहयोग गरे स्वतन्त्र चुनाव उठ्‍छु नत्र उठ्दिन भनेको थिएँ । प्रचण्डले देउवासँग सल्लाह गरेर भन्छु भन्‍नु भएको थियो' भुसालले इकागजसँग भने 'ल हामी सहयोग गर्छौँ भन्नु भयो । यो क्षेत्रमा माओवादीले उम्मेदवारी हाल्दैन ।'

---

सत्ता गठबन्धनले टिकट भागबन्डा लगाउँदा रुपन्देही-१ नेकपा माओवादी केन्द्रको भागमा परेको थियो । भुसाललाई फोन गरेर सत्ता गठबन्धनको सहयोग रहने माओवादी अध्यक्ष पुष्पकमल दाहाल प्रचण्डले बचन दिएका थिए ।

प्रचण्ड गएराति फोन गरेर उक्त क्षेत्रमा सत्ता गठबन्धनको उम्मेदवारी नहुने भुसाललाई बताएपछि आइतबार बिहान भुसालले पत्रकार सम्मेलन गरेर जानकारी दिएका थिए ।