राजनीतिले धेरै विश्वास गुमाइसक्योः प्रदीप पौडेल

काठमाडौँ - नेपाली कांग्रेसका नेता प्रदीप पौडेलले राजनीतिले धेरै विश्वास गुमाइसकेको बताएका छन् । सोमबार बूढानीलकण्ठ नगरपालिका-४ को विष्णुमती किनार करिडोर सडकको शिलान्यास गर्दै उनले घोषणापत्र लेख्ने, प्रतिवद्धताहरू व्यक्त गर्ने तर काम केही नहुने स्थिति निरन्तर रहे राजनीतिसँग कोही पनि नजोडिने बताएका हुन् । 

काठमाडौं निर्वाचन क्षेत्र नम्बर ५ बाट प्रतिनिधि सभामा निर्वाचित सांसदसमेत रहेका पौडेलले विकास निर्माणका काम हुन नसके राजनीतिको ठूलो तहमा पुगेका नेताहरूलाई पनि समाजले सम्मान गर्ने स्थिति नरहने दाबी गरे । भइरहेका, रोकिएका र गर्नुपर्ने कामको सूची बनाएर व्यवस्थित र प्राथमिकताका आधारमा कामहरू अघि बढाउन आफू प्रतिवद्ध रहेको उनको भनाइ थियो । ‘राजनीतिले धेरै विश्वास गुमाइसकेको छ । घोषणापत्र लेख्ने, प्रतिवद्धताहरू व्यक्त गर्ने तर काम केही नहुने स्थिति निरन्तर रहिरह्यो भने राजनीतिसँग कोही जोडिँदैन,' नले भने, 'राजनीतिको ठूलो तहमा पुगे पनि समाजले सम्मान गर्ने स्थिति हुँदैन ।’

---

नेता पौडेलले आफ्नो निर्वाचन क्षेत्रमा बाटो र खानेपानीको समस्या धेरै रहेको बताए । उनले आफूले निर्वाचनको बेलामा जनतासँग गरेका प्रतिवद्धताहरूलाई पूरा गर्न निर्वाचन क्षेत्रमा रहेका समस्या समाधानको पहलकदमी थालेको पनि बताए । उनले सरकार सञ्चालन गर्ने हरेक दलहरूले एक घर, एक धाराको नीति लिए पनि काठमाडौंमा नै एक घर, एक धाराको नीति लागू गर्न नसकेको बताए । ‘बाटो, खानेपानीको समस्या धेरै छन । सरकारको नीति एक घर, एक धारा छ । काठमाडौंमा लागू हुन सकेको छैन,' उनले भने, 'हामीले यो कुरालाई प्रखर ढंगबाट अघि बढाउनु पर्छ । कर तिरेका नागरिकहरूले सुविधा पाउँ भनेर भन्नु भनेको हुन नसक्ने कुरा खोजेको होइन, तर किन सुविधा उपलब्ध हुन सकेका छैनन् । ताली बज्ने कुरामात्रै हामीले गरेर हुँदैन ।’