कांग्रेस महामन्त्री थापाको चेतावनीः अँध्यारो कोठाभित्र हुने निर्णयलाई कांग्रेसले बोक्ने छैन

काठमाडौं– नेपाली कांग्रेसका महामन्त्री तथा सांसद गगन थापाले सरकार गठनको सन्दर्भमा पार्टीभित्र छलफलविनै निर्णय भए त्यसलाई आफूहरूले समर्थन नगर्ने चेतावनी दिएका छन् । बुधबार कांग्रेस संसदीय दलको नेतामा पराजित भएपछि सञ्चारकर्मीसँगको कुराकानीमा उनले यस्तो चेतावनी दिएका हुन् ।  

सरकार गठबन्धनको सन्दर्भमा पार्टीभित्र छलफल नगरी कुनै पनि निर्णय भए त्यो व्यक्तिगत निर्णयका रुपमा दर्ज हुने उनले बताए । ‘म यो समयमा दुईटा कुरा प्रष्ट बताउन चाहन्छु । सरकार गठनका लागि संसदीय दलको नेताले नै पहल गर्ने हो । तर, कांग्रेसले गर्ने कुनै पनि निर्णय चाहे त्यो सरकारको आलोपालोको सन्दर्भमा होस् या राष्ट्रपतिको सन्दर्भमा ती निर्णयहरू पारदर्शी भएनन् भने ती व्यक्तिगत निर्णयका रुपमा दर्ज हुनेछन्,’ उनले भने, ‘त्यो कुरा म अहिले नै भन्दैछु ।’

---

उनले अगाडि भने, ‘बन्द वा अँध्यारो कोठाभित्र भएका निर्णयलाई नेपाली कांग्रेसले बोक्दैन । त्यतिबेला कांग्रेसले धोका दियो भनेर भन्न पाइँदैन ।’

उनी आज कांग्रेस संसदीय दलको नेतामा सभापति शेरबादुर देउवासँग पराजित भएका छन् ।