प्रचण्डलाई प्रश्‍न : सुरुमा प्रधानमन्त्री तपाईं कि शेरबहादुर देउवा ?

काठमाडौँ- नेकपा माओवादी केन्द्रका अध्यक्ष पुष्पकमल दाहाल प्रचण्डलाई पत्रकारहरूले पहिलो चरणमा प्रधानमन्त्री को बन्‍ने भन्दै प्रश्‍न गरेका छन् । संघीय संसद्‌मा शपथ ग्रहणपछि बाहिरिने क्रममा प्रचण्डलाई पत्रकारहरूले प्रश्‍न गरेका हुन् ।

प्रचण्डलाई पत्रकारहरूले पहिलो प्रश्‍न गरे- अब कसरी अगाडि बढ्‌छ सरकार निमार्णको प्रक्रिया ? बास्तविक खेल अब सुरु भयो ? पत्रकारको प्रश्‍न सुनेपछि प्रचण्डले भने 'सबै प्रक्रिया सहज ढंगले अघि बढेको छ । प्रतिनिधिसभा र प्रदेशसभाको चुनाव शान्तिपूर्ण ढंगमा भयो । आज शपथ ग्रहण पनि उत्साहको वातावरणमा भयो । अब सरकार पनि यही ढंगले बढ्‌छ ।'

---

पत्रकारहरूले प्रचण्डलाई अर्को प्रश्‍न गरे- सरकार यही गठबन्धनको बन्छ कि परिवर्तन हुन्छ ? प्रचण्डले सहजै जवाफ दिए- 'यही गठबन्धनको बन्छ ।'

त्यसपछि संसद्‌ भवनको परिसरबाट बाहिरिन खोजेका प्रचण्डलाई हिँड्‍दाहिँड्‌दै अर्को प्रश्‍न गरे- सुरुमा प्रधानमन्त्री तपाईं कि शेरबहादुर देउवा ? प्रचण्डले हिँड्‍दाहिँड्‌दै जवाफ दिए- 'हामी सल्लाह गर्दैछौँ'