सरकारका प्रवक्ता भन्छन्- केही बेरपछि फेरि गठबन्धनको बैठक बस्छ

काठमाडौँ - सरकार गठनका विषयमा छलफल गर्न आइतबार बसेको सत्ता गठबन्धनको बैठक पनि निष्कर्षविहीन भएको छ । प्रधानमन्त्री निवास बालुवाटारमा आइतबार बसेको बैठकमा दलहरूको अडान कायमै रहेपछि छलफल निष्कर्षविहीन बनेको हो ।

गठबन्धनभित्र पहिला को प्रधानमन्त्री बन्ने भन्ने विषय कांग्रेस सभापति शेर बहादुर देउवा र माओवादी अध्यक्ष प्रचण्डबीच सहमति जुट्न सकेको छैन । बैठकपछि सञ्चार मन्त्री एवं कांग्रेस नेता ज्ञानेन्द्रबहादुर कार्कीले गठबन्धन जोगाउनु अहिलेको आवश्यकता भएको भन्दै प्रधानमन्त्रीले निरन्तर छलफल गरेर निष्कर्षमा पुराउने जानकारी दिए । उनले अन्तिम समयसम्म सहमति हुने दाबी गरे । सरकार गठनका विषयमा सबै कोणबाट छलफल भएको बताए । 'गठबन्धन मुलुकको आवश्यकता हो । छलफल जारी छ,' उनले भने, 'केही समयपछि फेरि बैठक सुचारु हुन्छ । आन्तरिक छलफल जरुरी छ । प्रधानमन्त्री शेरबहादुर देउवाले एउटा निष्कर्षमा पुर्‍याउने विश्‍वास छ ।'

---

गठबन्धनको बैठकपछि गठबन्धनका दलहरू आन्तरिक छलफल जुटेका छन् । राष्ट्रपति विद्यादेवी भण्डारीले ७ दिनको समय दिएर प्रधानमन्त्रीमा दाबी पेस गर्न आह्वान गरेको समयसीमा आइतबार साँझ ५ बजे सकिने भए पनि दलहरूबीच सरकार गठनबारे सहमति हुन सकेको छैन ।