आज एकीकृत समाजवादीमा प्रवेश गर्दै घनश्याम भुसाल

काठमाडौं - नेकपा (एमाले) छाडेर स्वतन्त्र उमेदवार चुनाव लडेका घनश्याम भुसाल आज नेकपा (एकीकृत समाजवादी)मा प्रवेश गर्ने भएका छन् । भुसालको स्वागतका लागि एकीकृत समाजवादीले आज दिउँसो २ बजे नयाँ बानेश्वरको अर्याल होटेलमा कार्यक्रम राखेको छ । उनलाई अध्यक्ष माधव कुमार नेपालले स्वागत गर्ने कार्यक्रम छ । 

भुसाल मंसिर ४ गते भएको प्रतिनिधिसभा चुनावमा नेकपा एमाले परित्याग गरी रुपन्देही १ बाट स्वतन्त्र चुनाव लडेका थिए ।  तत्कालीन नेपाली कांग्रेस नेतृत्वको सत्ता गठबन्धनले समर्थन गरे पनि उनले चुनाव जित्न सकेनन् । 

---

एमाले स्थायी कमिटी सदस्य रहेका भुसालले मंसिर ४ गते भएको प्रतिनिधिसभाको निर्वाचनमा पार्टीबाट टिकट पाएका थिएनन् । 

नेकपा एमालेको १०औँ महाधिवेशनमा उनी उपाध्यक्षमा पराजित भएका थिए ।