माधव नेपालको ठहर : राष्ट्रिय स्वतन्त्र पार्टी सस्तो लोकप्रियताको नारा दिएर उदाएको पार्टी हो

काठमाडौं– नेकपा (एकीकृत समाजवादी)का अध्यक्ष माधवकुमार नेपाललाई रवि लामिछाने नेतृत्वको राष्ट्रिय स्वतन्त्र पार्टी (रास्वपा)लाई सस्तो लोकप्रियताको नारा लगाएर उदाएको पार्टीको संज्ञा दिएका छन् । शनिबार अध्यक्ष नेपालले पार्टीको केन्द्रीय कमिटी बैठकमा पेस गरेको राजनीतिक प्रतिवेदनमा उनले यस्तो आरोप लगाएका हुन् ।

वर्तमान राजनीतिक परिस्थितिदेखि चुनावमा कम मत आउनुका कारणबारे समीक्षा गरिएको उक्त प्रतिवेदनमा उनले भनेका छन्, ‘रास्वपा प्रतिनिधि सभाको विघटन र नेकपाको विभाजनले उत्पन्न गरेको राजनीतिक अन्योल र सामाजिक निराशाको परिस्थितिमा सस्तो लोकप्रियताकाे नारा दिएर उदाएको पार्टी हो । सस्तो लोप्रियतावादले सर्वसाधारण जनतामा भ्रम दिएर प्रतिकृयावादको सेवा गर्ने गर्दछ । यसले पनि त्यही भूमिका निर्वाह गर्दै छ ।’

---

त्यस्तै, रास्वपासँग स्पष्ट दर्शन, सिद्धान्त र कार्यदिशा नभएको जिकिर गरेका छन् । रास्वपाले आफूलाई संविधानवादी भनेर दाबी गरे पनि गणतन्त्र र संघीयताप्रति स्पष्ट धारणा नभएको पनि उनको भनाइ छ ।

‘यस पार्टीको दर्शन, सिद्धान्त, विचार र कार्यदिशा केही पनि स्पष्ट छैन । संविधानवादको कुरा गरे पनि गणतन्त्र र सङ्घीयताप्रति यसको दृष्टिकोण के हो भन्ने पनि स्पष्ट छैन । यो पार्टी प्रतिनिधि सभाको विघटन र नेकपाको विभाजनले उत्पन्न गरेको राजनीतिक अन्योल र सामाजिक निराशाको परिस्थितिमा सस्तो लोकप्रिय नारा दिएर उदाएको पार्टी हो,’ प्रतिवेदनमा उल्लेख छ, ‘सस्तो लोकप्रियतावादले सर्वसाधारण जनतामा भ्रम दिएर प्रतिकृयावादको सेवा गर्ने गर्दछ । यसले पनि त्यही भूमिका निर्वाह गर्दैछ ।’

उनले रास्वपालाई पुँजीपति पार्टीका रूपमा पनि चित्रण गरेका छन् । 'प्रतिनिधि सभाको चौथो स्थानमा रहेको राष्ट्रिय स्वतन्त्र पार्टी पुँजीपति वर्ग चरित्रको पार्टी हो,’ प्रतिवेदनमा उल्लेख छ । 

नेपालले बैठकमा प्रस्तुत गरेको प्रतिवेदनमा राष्ट्रिय राजनीतिक परिस्थिति, राजनीतिक शक्तिहरूलगायत विभिन्न विषय समेटिएका छन् । 

एकीकृत समाजवादीको केन्द्रीय कमिटी बैठक शनिबारदेखि सुरु भएको हो । यो भोलिसम्म चल्नेछ ।