राप्रपाको निष्कर्ष : मुलुक अस्थिरतातर्फ धकेलियो

काठमाडौँ- राष्ट्रिय प्रजातन्त्र पार्टीले मुलुक पुनः सत्ता केन्द्रित अस्थिरतातर्फ धकेलिएको बताएको छ ।

पुरानो गठबन्धनमा भएको सहमति विपरित प्रधानमन्त्री पुष्पकमल दाहाल प्रचण्डले राष्ट्रपतिमा नेपाली कांग्रेसका उम्मेदवारलाई समर्थन जनाउने निर्णय लिएको भोलिपल्ट राप्रपाले सो टिप्पणी गरेको हो । आज बसेको केन्द्रीय कार्यसम्पादन समिति र संसदीय दलको संयुक्त बैठकले प्रचण्ड नेतृत्वको सरकारबाट बाहिरिने निर्णयसमेत लिएको छ ।

---

‘शुभेच्छुकहरूको ठूलो पंक्तिको असहमतिबीच नेपालको निर्णायकत्व नेपालीको हातमा स्थापित गर्दै देशमा बलियो राष्ट्रिय शक्ति निमार्ण, राष्ट्रियता, विकास, सुशासन, सेवा प्रवाह र स्थिरतालाई मुल आधार बनाएर २०७९ पुस १० गते राप्रपा नेपालको समेत समर्थनमा वर्तमान सरकार गठन भएको हो,’ राप्रपाले भनेको छ, ‘यसै पृष्ठभूमिमा माघ ३ गते हामी सरकारमा सहभागी भई क्रियाशिल रहेको बेला वर्तमान सत्ता सहकार्यमा आकस्मिक परिवर्तन भई मुलुक पुनः सत्ता केन्द्रित अस्थिरतातर्फ धेकेलिएको छ । यो हाल देखिएको सत्ता परिवर्तनको प्रवृति र प्रक्रिया वर्तमान संविधानको संरचनामा निहित अस्थिरताको स्वभाविक चरित्र हो भन्ने हाम्रो ठहर छ ।’

परिवर्तित सन्दर्भमा सरकारमा रहिरहनु उचित नभएको पनि राप्रपाको ठहर छ । ‘परिवर्तित सन्दर्भमामा राप्रपा सत्तामा रहिरहनु अनुपयुक्त हुने ठहर गर्दै आजैबाट सरकारलाई दिएको समर्थन फिर्ता लिएर सरकारबाट बाहिरिने निर्णय गरेका छौं,’ आकस्मिक रुपमा बसेको बैठकको निर्णयमा भनिएको छ, ‘साथै प्रदेश सरकारमा पनि राप्रपाले यसै बमोजिमको दृष्टीकोण रहेकाले सरकारलाई दिएको समथर्न फिर्ता लिने र सरकारबाट समेत बाहिरिने निर्णय गरेको छ ।’