'जनताको करबाट पूर्व राष्ट्रप्रमुखको उपचार गरी राज्यलाई भार नबोकाऊ'

काठमाडौँ- राष्ट्रिय प्रजातन्त्र पार्टीका प्रवक्ता मोहनकुमार श्रेष्ठले जनताको करले राजनीतिज्ञ र उच्च ओहदाका व्यक्तिको उपचारमा खर्च गरेर राज्यलाई भार नबोकाउन आग्रह गरेका छन् ।

पूर्वराष्ट्रपति डा.रामवरण यादव र पूर्वप्रधानमन्त्री झलनाथ खनाललाई राज्यले उपचार गर्न २ करोड ७५ लाख उपलब्ध गराएपछि उनले मंगलबार फेसबुकमा स्टाटस लेखेर प्रतिक्रिया जनाएका हुन् ।

---

'आम सर्वसाधारण सामान्य उपचारका लागि छटपटाइरहनु परेको अवस्थामा कुनै व्यक्ति विशेषप्रति आजीवन राज्यको असीमित दायित्व हुनु विडम्बनापूर्ण छ,' उनले भनेका छन्, 'जीवनको एउटा कालखण्डमा उच्च ओहदामा पुगेकालाई असीमित लाभ दिने र आम नागरिकले सामान्य लाभ पनि लिन नसक्ने असमान व्यवस्था न्यायसंगत छैन ।'

असमान व्यवस्थाको अन्त्य गरी विद्यमान नीतिमा संशोधन गरेर भएपनि सबै नागरिकलाई स्वास्थ्यको पहुँचमा पुर्‍याउन उनले माग गरेका छन् । 'जनताको करबाट राजनीतिज्ञ वा उच्च ओहदाका व्यक्तिको उपचारको असीमित दायित्व नबोकाइयोस,' उनले अगाडि थपे ।