देउवालाई शेखरको सन्देश- सम्मानजनक सहभागिता नभए सरकारमा जान्‍नौँ

काठमाडौँ - नेपाली कांग्रेसको संस्थापनइतर समूहले मन्त्रिपरिषद्‍मा सम्मानजनक सहभागिता नभए सरकारमा नजाने चेतावनी दिएको छ । सभापति शेरबहादुर देउवालाई शुक्रबार बिहान सन्देश पठाउँदै शेखर कोइराला समूहले मन्त्रिपरिषद्‍मा आफूहरूको सम्मानजनक सहभागिता नभर सरकारमा नजाने चेतावनी दिएको हो । 

समूहका एक नेताका अनुसार नेता शेखर कोइरालाले मन्त्रिपरिषद्मा सम्मानजनक सहभागिता नभए सरकारमा नगएर बाहिरै बसेर सहयोग गर्ने सन्देश देउवालाई पठाएका छन् । 'हामीले सम्मानजनक सहभागिताका लागि सभापतिज्यूलाई आग्रह गरेका छौँ,' ती नेताले इकागजसँग भने, 'सम्मानजक सहभागिता नभए सरकार बाहिरै बसेर सहयोग गर्छौँ भनेका छौँ ।'

---

ती नेताका अनुसार शुक्रबार बिहानै समूहका नेता कोइरालाले उपसभापति धनराज गुरुङ, महामन्त्री गगन थापा, सहमहामन्त्री बद्री पाण्डे र जीवन परियारसँग छलफल गरेका थिए । छलफलपछि शेखरले देउवालाई सन्देश पठाएका हुन्।

आज मन्त्रिपरिषद् विस्तार हुँदैछ । कांग्रेसले अर्थ मन्त्रालयसहित आठ मन्त्रालयले पाएको छ । शेखर समूहले तीन मन्त्रालयमा दाबी गरेको छ । सभापति देउवाले भने दुई मन्त्रालय लिन शेखरलाई सुझाएका छन् ।

कांग्रेस उपसभापति पूर्णबहादुर खड्काको नेतृत्वमा सरकारमा जाने तयारीमा छ । 

कांग्रेसबाट खड्कासहित उपसभापति धनराज गुरुङ्, एनपी साउँद, सिता गुरुङ, डिगबहादुर लिम्बू, प्रकाश शरण र मोहन बहादुर बस्नेत मन्त्री बन्ने चर्चा छ ।