संक्रमणकालीन न्यायसम्बन्धी विधेयकलाई फास्ट ट्रयाकबाट अघि बढाउन माओवादी केन्द्रकाे माग

काठमाडौँ- नेकपा (माओवादी केन्द्र)ले संक्रमणकालीन न्यायसम्बन्धी विधेयकलाई फास्ट ट्रयाकबाट अघि बढाउन माग गरेको छ । सिंहदरबारमा मंगलबार बसेको माओवादी संसदीय दलको बैठकले शान्ति प्रक्रियाका बाँकी कामलाई छिटो टुङ्गोमा पुर्‍याउनका लागि साे माग गरेको हो ।

बैठकले संवैधानिक परिषद् र सम्पत्ति शुद्धीकरणसम्बन्धी विधेयकलाई पनि छिटो पारित गर्नका लागि माग गर्ने निर्णय गरिएको माओवादी संसदीय दलका प्रमुख सचेतक हितराज पाण्डेले जानकारी दिए ।

---

बैठकमा पार्टी अध्यक्ष एवं प्रधानमन्त्री पुष्पकमल दाहाल प्रचण्डले विधेयकहरू अघि बढाउदा प्रतिपक्षीसहितका दलहरू सहमति खोज्नुपर्नेमा जोड दिएका थिए । संक्रमणकालीन न्यायका विषयमा पनि शीर्ष तहमा छलफल गरेर समझदारी गरेर जाने तयारी भइरहेको पनि प्रधानमन्त्रीले बताएको पाण्डेले बताए ।​

संसदीय दलको बैठकले दलको विधान परिमार्जनका लागि पाँच सदस्यीय कार्यदल गठन गरेको छ । कार्यदललाई एक महिनाभित्रै संशोधनसहितको आवश्यक प्रतिवेदन बुझाउन निर्देशन दिइएको प्रमुख सचेतक पाण्डेले बताए ।