युवालाई राष्ट्र निर्माणको महाअभियानमा सरिक गराउन ढिला गर्नुहुन्न : डा. कोइराला

काठमाडौँ-  नेपाली कांग्रेस नेता डा. शेखर कोइरालाले युवाको पाखुरा, ज्ञान र क्षमतालाई राष्ट्र निर्माणको महाअभियानमा सरिक गराउन ढिला भएको बताएका छन् ।

नयाँ वर्ष २०८० को शुभकामना दिँदै कोइरालाले बढ्दो बेरोजगारीलाई सम्बाेधन गर्न युवालाई राष्ट्र निर्माणमा सहभागी गराउनुपर्ने बताएका हुन् । उनले भनेका छन्, 'हाम्रा सामु चुनौतीहरू पनि चानचुने छैनन् । बढ्दो बेरोजगारीलाई सम्बाेधन गरी युवाको पाखुरा, ज्ञान र क्षमतालाई राष्ट्र निर्माणको महाअभियानमा सरिक गराउन अब ढिलो गर्ने छुट हामीलाई छैन ।'

---

उनले भ्रष्टाचार, कुशासन र महंगी अनियन्त्रित भएको समेत बताएका छन् । राजनीतिक दल र तिनका नेताप्रति आम नागरिकको भरोसा र विश्वास माथि प्रश्न उठेको बताए । उनले भने, 'भ्रष्टाचार, कुशासन र महंगी अनियन्त्रित भएको छ । राजनीतिक दल र तिनका नेताप्रति आम नागरिकको भरोसा र विश्वास माथि प्रश्न उठिरहेको तीतो यथार्थ अब हामी कसैबाट लुकेको छैन । अब पनि शासन, प्रशासन र राजनीतिक दलहरू नागरिकमैत्री हुन ढिलो भए सात दशक लगाएर जारी गरिएको नेपालको संविधान प्राप्तिको रटानले मात्र नागरिकको चित्त बुझाउन सकिन्न ।'