सांसदहरूको मागअनुसार संशोधन नभए बजेट पास हुन दिँदैनौँ : अध्यक्ष राउत

काठमाडौँ- जनमत पार्टीका अध्यक्ष डा. चन्द्रकान्त राउतले सांसदहरूको मागअनुसार बजेट संशोधन नभए बजेट पास हुन नदिने बताएका छन् ।

सोमबार प्रतिनिधि सभा अन्तर्गतको पूर्वाधार विकास समितिको बैठकमा बोल्दै अध्यक्ष डा.राउतले बजेटमा सांसदका मागहरू सम्बोधन हुने गरी बजेट संशोधन नभए सत्तापक्षका सांसदहरूले नै बजेट पास हुन दिन नहुने बताएका हुन् । उनले पूर्वाधार विकास समितिले सुझावसहित बजेट संशोधनको प्रस्ताव लैजान माग गरे ।

---

अध्यक्ष राउतले सुझावसहित बजेट संशोधनको प्रस्ताव कार्यान्वयन नभए पनि सरकारले ल्याएको बजेट संशोधनको आवश्यकता रहेको उल्लेख गरे । उनले एक जना मन्त्रीले मात्रै बजेट बनाउने भए २७५ सांसदहरू आवश्यकता नभएको भन्दै निर्वाचित भएर आएका सांसदहरूको कुरा सरकारले सुन्नुपर्ने जिकिर गरे ।

उनले सरकारले सांसदहरूका कुरा नसुने बजेटलाई पारित हुन नदिने अधिकार सांसदहरूलाई रहेको भन्दै सत्तापक्ष र प्रतिपक्षका संसदहरूले आफ्नो अधिकार उपयोग गर्न आग्रह गरे । उनले मधेश प्रदेशभन्दा सुदूरश्चिममा ६ गुणा बढी बजेट गएको विनियोजन भएको भन्दै जनसंख्या वा मानव विकास सूचकांकका आधारमा बजेट निर्धारण गर्ने गरी संशोधन हुनुपर्ने बताए ।