कांग्रेसले राष्ट्रपति पाउने सहमतिमा प्रधानमन्त्रीलाई विश्वासको मत दिएका थियौँ : उपप्रधानमन्त्री खड्का

काठमाडौँ– नेपाली कांग्रेसका उपसभापति तथ उपप्रधानमन्त्री पूर्णबहादुर खड्काले नेपाली कांग्रेसले राष्ट्रपति पाउने भएपछि प्रधानमन्त्री पुष्पकमल दाहाल 'प्रचण्ड'लाई विश्वासको मत दिएको बताएका छन् । मंगलबार कांग्रेस पार्टी कार्यालय, सानेपामा जारी केन्द्रीय कार्यसमितिको बैठकमा बोल्दै उनले यस्तो बताएका हुन् ।

कांग्रेसले विश्वासको मत दिएसँगै गठबन्धन पुनःस्थापित हुने वातावरण बनेको र कांग्रेस सरकारमा पुगेको उनको भनाइ छ । ‘पुस २६ गते प्रधानमन्त्री पुष्पकमल दाहाल 'प्रचण्ड'को नेतृत्वलाई विश्वासको मत दिने निर्णयमा पुग्यौँ,’ उपसभापति खड्काले भने, ‘त्यही विश्वासको मत दिने विश्वासको वातावरण जुन बनाइएको थियो । त्यो विश्वासको मत हामीले दिएपछि राष्ट्रपतिको निर्वाचनमा एउटा वातावरण बनाएर नेपाली कांग्रेसको उम्मेदवारको पक्षमा फर्कने वातावरण बनाउनका लागि वर्तमान प्रधानमन्त्री प्रचण्डले प्रतिवद्धता व्यक्त गर्नुभएको थियो ।’

---

उनले अगाडि भने, ‘त्यही विश्वासको मतबाट पुस १० गते भत्किएको गठबन्धन पुनःस्थापित हुने राजनीतिक वातावरण बन्यो । त्यही वातावरण स्वरूप रामचन्द्र पौडेललाई राष्ट्रपतिका रूपमा निर्वाचित गर्यौँ ।’ 

उपसभापति खड्काले सरकारले जनतालाई उत्साहित र प्रेरित गर्ने खालको काम गर्नुपर्ने समेत बताए । जनताको अपेक्षा पार्टीले सरकारमा गएर राम्रो काम गरोस् भन्ने रहेको भन्दै आफूले सरकारमा रहेर कुनै गल्ती र कमजोरी नगरेको उनले बताए ।

उपसभापति  खड्काले सरकारले गर्नुपर्ने कामबारे केन्द्रीय समितिले ध्यानाकर्षण, सुझाव तथा निर्देशन दिने विश्वाससमेत व्यक्त गरे ।