समय परिस्थिति अनुसार चल्न नसके कांग्रेसलाई गाह्रो पर्न सक्छ : सिंह

काठमाडौँ- नेपाली कांग्रेसका नेता प्रकाशमान सिंहले समय परिस्थिति अनुसार चल्न नसके आगामी दिनमा कांग्रेसलाई गाह्रो पर्न सक्ने बताएका छन् ।

बिहीबार काठमाडौँमा आयोजित नेपाली कांग्रेस काठमाडौँ प्रदेश १ ख र वडा नम्बर ३१ को संयुक्त सम्मेलनमा नेता सिंहले कांग्रेस पुरानो पार्टी भएकाले इतिहासको मात्रै कुरा गरेर नपुग्ने भन्दै समय परिस्थिति अनुसार चल्न नसके आगामी दिनमा कांग्रेसलाई गाह्रो पर्न सक्ने बताएका हुन् ।

---

उनले जनताको गुमेको अधिकार फिर्ता ल्याएर कांग्रेसले परिवर्तनको नेतृत्व गरेकाले पार्टी गरेका कामलाई जनताले अनुभूति हुने गरी प्रचारप्रसार गर्नुपर्ने धारणा राखे ।

नेता सिंहले कांग्रेसका गतिविधि निकै खर्चिलो हुन थालेको भन्दै यसमा पनि सुधार गर्नुपर्ने बताए । पार्टीभित्र एक अर्कालाई दोष लगाएर कोही पनि बलियो हुन नसक्ने भन्दै उनले पार्टीभित्रको विमतिलाई औपचारिक तथा अनौपचारिक बैठकमा छलफल गर्नुपर्ने जिकिर गरे ।

नेता सिंहले पार्टी नेता तथा कार्यकर्ताहरू विधि पद्धति अनुसार हिँड्नुपर्ने र जिम्मेवारबोधका साथ अघि बढ्नुपर्ने बताए ।