संसद् अवरोध गर्नु जायज छैन : प्रदीप यादव

काठमाडौँ- जनता समाजवादी पार्टी, नेपालका सांसद प्रदीप यादवले प्रमुख प्रतिपक्ष दल नेकपा एमालेले संसदमाथि खेलवाड गरेको बताएका छन् ।​

सोमबार संसद् बैठकपछि सञ्चारकर्मीहरूसँग कुराकानी गर्दै सांसद यादवले प्रमुख प्रतिपक्ष दल एमालेले संसद् अवरोध गरेर संसदमाथि खेलवाड गरेको बताएका हुन् । उनले यतिखेर संसद् अवरोध गर्नु जायज नभएको भन्दै संसद् अवरोध गर्न एमालेले नाटक रचेको बताए । उनले सुन तस्करी प्रकरणको छानबिन गर्न समिति बनाउनु आवश्यक नभएको बताए ।

---

यादवले समिति बनाए प्रतिवेदन थन्क्याएर राख्ने बाहेक काम नहुने भन्दै आपराधिक घटनाको छानबिन गर्ने काम नेपाल प्रहरीको भएको जिकिर गरे । प्रहरीमाथि विश्वास गर्नुपर्ने उनकाे भनाइ छ ।

सांसद यादवले गौर हत्याकाण्डको विषयलाई उठाएर जसपामाथि षड्यन्त्र र घेराबन्दी गर्न खोजिएको पनि उल्लेख गरे । उनले तत्कालीन माओवादीको हठका कारण गौर हत्याकाण्ड भएको बताए । उनले सो घटनाको छानबिन दुई वटा उच्चस्तरीय समितिले गरेको भन्दै छानबिन समितिले सरकारलाई दिएको प्रतिवेदन सार्वजनिक गर्न प्रधानमन्त्रीलाई आग्रह गरे ।