संसद्‍मा गहन अध्ययन र बहसबिनै विधेयकहरू बहुमतको भरमा पास हुन्छन् : अध्यक्ष राउत

काठमाडौँ- जनमत पार्टीका अध्यक्ष डा. चन्द्रकान्त राउतले संसदमा गहन अध्ययन र बहस बिनै विधेयकहरू पारित गर्ने गरिएको भन्दै आपत्ति जनाएका छन् । शुक्रबार काठमाडौँमा आयोजित एक कार्यक्रमलाई सम्बोधन गर्दै उनले यस्तो बताएका हुन् ।

राउतले आफू संसद् छिरेको छोटो समयमै संसदप्रति वितृष्णा जागेको जिकिर गरे । उनले सबैले संसद् ऐन, कानुन निर्माण गर्ने थलो हो भन्ने सोचे पनि बिनाछलफल र अध्ययन बहुमतको आडमा ऐनहरू पारित गर्ने गरिएको भन्दै आपत्ति जनाए । उनले अहिलेको संसदीय व्यवस्थाबाट देशलाई आवश्यक पर्ने ऐनहरू गहन र विषयवस्तु आधारित भएर छलफल गरी पारित गर्न कठिनाइ रहेको बताए ।

---

अध्यक्ष राउतले ऐन बनाउँदा कुनै एक कर्मचारीले लेख्ने र त्यो ऐन पढ्न माग्दा समेत कमजोरी पत्ता लाग्ने डरले सचिवहरूले नदिने गरेको दाबी गरे । उनले संसदबाट धेरै आशा गर्न नसकिने बताए । उनले सचिवसँग निजामती ऐन माग्दा नदिएको गुनासो गरे ।

अध्यक्ष राउतले शिक्षकलाई उचित पारिश्रमिक दिनुपर्ने र शिक्षा पेसालाई मर्यादित बनाउनुपर्ने बताए ।