साम्प्रदायिक सद्भाव भड्काउन खोज्नेहरू अहिले पनि सक्रिय छन् : केपी ओली

काठमाडौँ- नेकपा एमाले अध्यक्ष केपी शर्मा ओलीले साम्प्रदायिक सद्भाव भड्काउन खोज्नेहरू अहिले पनि सक्रिय रहेको बताएका छन् ।

अखिल नेपाल महिला संघ मध्यपुर थिमि नगर कमिटले शनिबार भक्तपुरमा आयोजना गरेको तीज शुभकामना कार्यक्रममा ओलीले चाडबाड, एकता र सबै जातका मान्छेहरू एकै ठाउँ बसेको मन नपराउनेहरूले साम्प्रदायिक सद्भाव भड्काउन खोजिरहेको बताएका हुन् । ओलीले सामाजिक सुप्रबन्ध र व्यवस्थालाई राम्रो बनाउन चाडपर्वहरूको विशेष महत्व रहेको बताए । उनले मुलुकको अवस्थामा परिवर्तन ल्याए पनि पूर्ण सन्तोषजनक हुने अवस्था नरहेको धारणा राखे ।

---

ओलीले ४८ सालमा तीज कार्यक्रममा अर्घाखाँचीमा कांग्रेसका कार्यकर्ताले महिलाहरूमाथि कुटपिट गरेको र त्यसको समस्या समाधान गर्न आफू जानुपरेको स्मरण गर्दै अहिले पनि त्यस्तो घटना दोहाेरिने खतरा कायमै रहेको बताए ।

उनले आयातित वस्तुलाई निरूत्साहित गर्दै स्वदेशी वस्तुको उपयोगमा जोड दिनुपर्ने धारणा राखे । मुलुकका उत्सव चाडपर्वहरूले आफ्ना खुट्टामा आफैँ उभिने प्रेरणा दिनुपर्ने उनको भनाइ छ ।