रास्वपाले वडामा पनि चुनाव गरेर नेतृत्व चुन्ने

काठमाडौँ– राष्ट्रिय स्वतन्त्र पार्टी (रास्वपा)ले वडाको नेतृत्व चयन गर्न चुनाव गर्ने भएको छ । रास्वपाले मंगलबार एक विज्ञप्ति जारी गर्दै वडा तहका समितिको लागि कात्तिक १० देखि १६ गतेसम्म निर्वाचनमार्फत नेतृत्व चयन गर्ने बताएको छ । 

रास्वपा सहमहामन्त्री तथा संगठन विभाग प्रमुख कविन्द्र बुर्लाकोटीले जारी गरेको विज्ञप्तिमा वडा कार्यसमितिमा जान चाहने इच्छुकहरुलाई असोज २ देखि २० गतेसम्म उम्मेदवारी दर्ता गर्न आह्वान गरिएको छ । त्यस्तै, चुनावमाफर्त कार्यसमितिमा चयन हुनेहरूको नामावली कात्तिक २० गते सार्वजनिक गरिने पार्टीले जनाएको छ । 

---

पार्टीले ११ जनाको वडा समिति बनाउने व्यवस्था गरेको छ । समितिमा सभापति, उपसभापति, सचिवसहित सबै सदस्य निर्वाचिन हुनुपर्नेछ । ११ मध्ये एक जना दलित महिला सदस्य हुनैपर्ने व्यवस्था गरिएको छ भने महिला चार जना, ४५ वर्षमुनि उमेर समूहका ६ जना निर्वाचित हुनेछन् ।

वडा कार्यसमितिमा जान चाहने इच्छुकहरुले अनलाइनमार्फत फारम भर्नुपर्ने छ । फारमको दस्तुर १०० रुपैयाँ लाग्नेछ ।