नेपालमा संस्कृति नीति बनाउन जरुरी भयो : वर्षमान पुन

काठमाडौँ– नेकपा (माओवादी केन्द्र) का सांसद वर्षमान पुनले नेपालमा संस्कृति नीति बनाउन जरुरी देखिएको बताएका छन् । शुक्रबार सिंहदरबारमा बसेको अन्तर्राष्ट्रिय सम्बन्ध र पर्यटन समितिको बैठकमा बोल्दै उनले यस्तो बताए । 

उनले नेपालमा संस्कृति नीति नभएका कारण विभिन्न धार्मिक र सांस्कृतिक विद्वेष फैलिरहेको उल्लेख गरे । उनले संस्कृति, पर्यटन तथा नागरिक उड्डयन मन्त्रालयलाई संस्कृति नीति बनाउन समितिले निर्देशन दिनुपर्ने बताए । उनले धरानको जस्तो घटनाहरू नेपालमा बढिरहेको भन्दै प्रश्न उठिसकेपछि सरकारले सम्बोधन गर्नुपर्ने बताए । 

---

‘सनातन धर्मका बारेमा एकले एक थोक र अर्कोले अर्को थोक भनिरहेको छ । त्यसलाई कसरी प्रयोग गर्छौँ त । यो खालको कुरा नीति नभएको देखिन्छ, नेपाल सरकारको । एउटा निर्देशन जरुरी छ । धर्मनिरपेक्षतामा कस्तो नीति हुन्छ भन्ने कुरामा जोड दिनुपर्छ । धरानजस्ता घटना बढेर गएका छन् । एउटा मन्दिर बनायो, धर्म मान्नेका लागि आस्थाको केन्द्र भयो, नमान्नेका लागि सांस्कृतिक सम्पदा हुँदो रहेछ । सांस्कृतिक सम्पदाको नीति के हुन्छ ? धार्मिक केन्द्रमाथिको नीति के हुन्छ ? प्रश्न उठेपछि राज्यले सम्बोधन गर्नुपर्छ,’ उनले भने ।

उनले अगाडि भने, ‘अलिखित मान्यता थियो तर अब समयको मागले लिखित माग गर्दै गइएको छ । आज नयाँ ढंगले व्यवस्थित गर्नुपर्छ । त्यसैले हामीलाई संस्कृति नीति जरुरी देखिन्छ । नीति बनाउन निर्देशन दिनुपर्ने देखिन्छ । धर्म निरपेक्ष सम्बन्धी र यसलाई व्यवस्थित गर्न आवश्यक कानुनको परिमार्जन गर्न निश्चित मर्यादा बनाउनुस् भन्नुपर्ने हुन्छ ।’

सांसद पुनले धर्म निरपेक्ष सम्बन्धी नीति र यसलाई व्यवस्थित गर्न आवश्यक कानुनको परिमार्जन गर्न निश्चित मर्यादा बनाउनुपर्ने पनि बताए ।