राजनीतिक दलहरूले जनतालाई पुनर्विश्वास दिलाउनुपर्ने आवश्यक्ता छ : रघुजी पन्त

काठमाडौँ- प्रमुख प्रतिपक्ष दल नेकपा एमालेका सांसद रघुजी पन्तले राजनीतिक दलहरू सच्चिनुपर्ने बताएका छन् ।​

गणतन्त्रविरुद्ध बोल्ने राजावादीहरूसँग सवालजवाफ गर्ने भन्दा पनि गल्ती गर्ने राजनीतिक दल र त्यसका नेताहरू सच्चिएर अघि बढ्नुपर्ने उनको भनाइ थियो । आइतबार संघीय संसद् भवन परिसरमा सञ्चारकर्मीहरूले राखेका जिज्ञासाको जवाफ दिने क्रममा सांसद पन्तले राजनीतिक दलहरूले जनतालाई पुनर्विश्वास दिलाउनुपर्ने धारणा समेत राखे ।

---

उनले भने, ‘राजावादीहरूसँग सवालजवाफ गरेर मात्रै पुग्दैन । लोकतन्त्रमा हामीले आफू सच्चिनुपर्छ । जो गल्ती गरेका छन्, ती नेताहरू सच्चिनुपर्छ । पार्टीहरूले सच्चिनुपर्छ । दलहरू जनताको छेउमा जानुपर्छ । दलहरूले जनतालाई पुनर्विश्वास दिलाउनुपर्ने आवश्यक्ता छ ।’

सांसद पन्तले राजनीतिक दलहरूले जनताको बीचमा जाने कामलाई तीब्रता दिनुपर्ने पनि बताए ।