राजसंस्था फर्काउने कुरा प्रतिगमन होइन, उत्कृष्ट अग्रगमनकारी बाटो होः मोहन श्रेष्ठ

काठमाडौं - प्रतिनिधिसभा र प्रदेशसभा सदस्य पदका लागि निर्वाचन भएको सोमबार एक वर्ष पूरा भएको छ । संविधानसभाबाट संविधान जारी भएपछि यो दोस्रोपटक प्रतिनिधिसभा र प्रदेशसभाका लागि सदस्य चयन गरिएको हो । 

यसबीचमा देखिएका राजनीतिक गतिविधिलाई समीक्षा गर्दै राप्रपाले देश ‘कोर्स करेक्सन’को सम्मुखमा रहेको भन्दै राजसंस्था फर्काउने कुरा प्रतिगमन नभएर उत्कृष्ट अग्रगमनकारी बाटो भएको दाबी गरेको छ । 

---

राप्रपा प्रवक्ता तथा प्रचार विभाग प्रमुख मोहन श्रेष्ठले निर्वाचनको एक वर्षमा सरकार सञ्चालनका क्रममा संघ र प्रदेशमा देखिएका रमिता, कुकृत्य गणतन्त्रका गहनाका रुपमा स्थापित भएको बताए । उनले देश कोर्स करेक्सनको सम्मुख रहेको भन्दै राजसंस्था फर्काउने कुरा प्रतिगमन नभएर उत्कृष्ट अग्रगमनकारी बाटो भएको बताएका हुन् । 

 

सामाजिक सञ्जाल फेसबुकमा उनले लेखेका छन् :

आज संसदीय निर्वाचन भएको एक वर्ष पूरा भएको छ। राजनीतिक दलहरुले चुनावी दौरानमा जनताको माझमा जॅादा गरेका बाचा र प्रतिबद्धताहरुको सम्झना र समिक्षा गरुन् । हामी पनि समिक्षा गर्छौं। निर्वाचनपछि बनेको सरकारमा सहभागी भएर राप्रपाले एउटा प्रयोग गऱ्यो, ४० दिन नपुग्दै नाटकीय रुपमा सत्तामा संकट देखिएपछि सबैभन्दा पहिले सरकारबाट बाहिरियौं । जति दिन सरकारमा रह्यौं राम्रो गर्ने प्रयास गऱ्यौं, नराम्रो गरेनौं । त्यसपछि सरकार सञ्चालनका क्रममा संघ र प्रदेशमा यो एक वर्षमा देखिएका रमिता, कुकृत्य गणतन्त्रका गहनाका रुपमा स्थापित भए । तथाकथित परिवर्तन राम्रो हो, उत्कृष्ट छ भनेर छाती खोली नागरिकका सामु भन्ने अॅाट यतिबेला कसैको छैन । बन्द कोठाभित्र लाभ लिएका केही तरमाराहरुले गणतन्त्र ठिक छ भन्नु आफैंमा लज्जाको विषय बनिरहेको छ। दिनहॅु हजारौं नौजवान युवाहरु लावालस्कर देश छाडेर परदेश लागिरहेका छन्, अर्थतन्त्र शिथिल र दबाबमा छ, भूराजनीतिक सन्तुलनमा गडबडी देखिदैछ। केही मुठ्ठीभर बाहेक आम जनता निराश छन्, जनजीवन त्रस्त छ। यो अवस्था कहिलेसम्म लम्ब्याउने ? अब पनि नागरिक नजागे, नउठे कहिले उठ्ने ? देशले अवलम्बन गरेको मार्गचित्र गलत र त्रुटिपूर्ण छ भनेर हामीले आज मात्र होइन, हिजोका कठिन र जटिल दिनमा समेत भन्यौं, निरन्तर भन्दै आइरहेका पनि छौं । आफ्नो एजेण्डामा सतिसाल झैं उभिएको राप्रपाको एजेण्डा क्रमश:सहि साबित हॅुदै गएको छ। हिजो कुनै बेला हाम्रा एजेण्डा लुकेर सुनाउनुपर्ने, कथित अग्रगमनकारीको निशानामा पर्नुपर्ने अवस्थाबाट आज खॅाटी गणतन्त्रवादी कहलिएका, गणतन्त्रबाट लाभ लिएकाहरुले समेत सगर्व बोकेर हिडिरहेको देख्दा सन्तोष र गर्वको अनुभूति हुन्छ।

नेपाल यतिबेला ‘कोर्स करेक्सन’को सम्मुखमा छ। यथास्थितिबाट देश अघि बढ्न सक्दैन भन्ने कुरा हामीले भनिरहन पर्दैन, यो अवस्था र व्यवस्थाका संवाहक शक्तिहरुले समेत भनिरहेको र स्विकारेको कुरा हो। यथास्थितिमा सुधार ल्याउने विकल्प छ र विकल्प राप्रपाले मात्रै दिएको छ। राप्रपाले अघि सारेको विकल्पमा छलफल गर्न कसैले हिनताबोध गर्नु पर्दैन। गल्ती चेतनशील प्राणीबाट नै हुने हो, गल्ती सच्याएर नेपालको माटो र परिवेश सुहॅाउदो नवीन व्यवस्थाका लागि हातेमालो गर्न राजनीतिक दलहरु, विभिन्न विचार समुह, स्वतन्त्र नागरिक सबैको ध्यानाकर्षण गराउॅदछु ।

राजसंस्था फर्काउने कुरा प्रतिगमन होइन, कतिपयले प्रतिगमनको भाष्य निर्माण गरिरहेका छन्, त्यो गलत छ । नेपालको लागि राजसंस्था अहिले भन्दा अघि बढ्ने अग्रगमनकारी उत्कृष्ट बाटो हो । नागरिकलाई अधिकारसम्पन्न बनाउने विभिन्न पाटोहरुमा छलफल हुन नसक्ने भन्ने छैन । आउनुहोस्, नवीन र सार्थक बहस प्रारम्भ गरौं ।

सबैभन्दा माथि देश, देशभन्दा माथि कोही छैन ।