राष्ट्रिय स्वाधीनता रक्षा नगर्ने सरकार काम छैन : ओली

गोरखा- नेकपा एमालेका अध्यक्ष केपी शर्मा ओलीले स्वाधीन र सार्वभौम राष्ट्र हुँदा हुँदै आफ्नो स्वतन्त्रताको प्रयोग गर्न नसक्नु लज्जाको कुरा भएको बताएका छन् ।

समृद्धिका लागि संकल्प यात्राका क्रममा गोरखा बजारमा शनिबार आयोजित अन्तरक्रिया कार्यक्रममा बोल्दै अध्यक्ष ओलीले भने, 'लिम्पीयाधुरा, लिपुलेक, कालापानीका प्रश्न उच्च स्तरीय संवादहरूमा किन उठ्दैन ? यो भन्दा गएगुज्रेका कुरा के हुन्छ । त्यो भन्दा देश प्रतिको बेइमानी के हुन्छ ।'

---

पुष्पलाल मध्यपहाडी लोकमार्ग केन्द्रित झुलाघाट चिवाभन्जाङ्ग यात्राका क्रममा शुक्रवार गोरखा आइपुगेका एमाले अध्यक्ष ओली शनिबार बिहान गोरखा सदरमुकाममा अन्तरक्रिया कार्यक्रममा सहभागी भएका हुन् ।

कार्यक्रममा बोल्दै अध्यक्ष ओलीले मध्यपहाडी लोकमार्ग निर्माणमा भइरहेको ढिलासुस्ती प्रति आपत्ति व्यक्त गरे । वर्तमान प्रधानमन्त्रीको निर्वाचन क्षेत्र समेत रहेको गोरखा आएका अध्यक्ष ओलीले व्यंगात्मक शैलीमा भने, 'विकासमा भइरहेको ढिलासुस्ती बारे म प्रधानमन्त्रीसँग कुरा गर्छु । हिजो वहाँकै निर्वाचन क्षेत्रमा पर्ने बाटो हुँदै म आएको हु । १०० किलोमिटर हिँडेकी भनेको त १६ किलोमिटर पो रहेछ ।'

अन्तर्क्रिया कार्यक्रममा गोरखाका स्थानीयहरूले अध्यक्ष केपी शर्मा ओलीसँग विकास निर्माणसम्बन्धी विभिन्न मागपत्रहरू बुझाएका थिए ।